Tiô tơbleăng, pêi pro Tơdroăng cheăng ‘’500 hâi măng’’ ti tăng, tơkŭm ƀă mơnhên inâi kơxêng kiâ mô đô̆i tá hâi tŭm tơdroăng, troh nôkố lâp tơnêi têa hiăng chiâ xo châ 1.080 kơxêng kiâ mô đô̆i. Khu xiâm pơkuâ Kŏng an séa ngăn, tơ’nôm, séa ngăn tơdroăng dêi hrĭng rơpâu mô đô̆i hlâ tung tơplâ xâ tá hâi mơnhên châ tơdroăng; tơkŭm po xo mâuh ADN a hên kong pơlê ƀă mơnhên inâi ăm 23 ngế.

Chin phuh hiăng tơbleăng Pơkâ pêi tơkŭm po mâu tơdroăng leh tơbâ 80 hơnăm Hâi mô đô̆i rong râ – Hlâ hía; mơjiâng Tơdroăng tơkêa bro ƀă tâi tâng kơxô̆ liăn dâng 13.000 rơtal liăn pêi pro tơdroăng pâ mơnê mâu ngế ai hnoăng, tŏng gum mơngế ai hnoăng kăch măng.

Xông tơpui mơgêi Hôp tơno tơdroăng kal, jâ Phạm Thị Thanh Trà, Phŏ Ngế pro xiâm hnê ngăn tơnêi têa tối rơdêi, leh tơbâ 80 hơnăm Hâi mô đô̆i rong râ – Hlâ hía cho tơdroăng kal kí ki kal, tơdroăng rôh nah, kal khât râ tơnêi; cho rôh vâ tâi tâng Đảng, tâi tâng kuăn pơlê, tâi tâng khu lêng pâ mơnê, pơ-ôu pơ-eăng mâu tơdroăng ki mơheăm chhá, hnoăng cheăng kân dêi mâu ngế ai hnoăng ƀă tơnêi têa.

Phŏ Ngế pro xiâm hnê ngăn tơnêi têa pơkâ tơkŭm po mâu tơdroăng leh tơbâ tơniăn kân krip, pơxúa păng ‘nâng, kơnâ, rơkê, ai ivá troh lâp lu; ƀă tơdroăng tŏng gum lĕm tro tâ kế tơmeăm khoăng, ihiâm mơno ăm rơpŏng mô đô̆i hlâ tung tơplâ xâ nah, mô đô̆i rong râ, châi tamo ƀă mơngế ai hnoăng tơnêi têa.