Vi ƀan pơkuâ cheăng Kuô̆k hô̆i séa ngăn, tơbleăng 2 tơdroăng pơkâ tơdjâk troh liăn ngân ƀă kơxop hlá mơ-éa séa ngăn “Cheăng pêi pro troăng hơlâ, luât ‘na pơkuâ ngăn, xúa tíu pêi cheăng klêi kơ’nâi pêi pro troăng hơlâ klâ xing xoăng kơ koan cheăng tơnêi têa ƀă tíu pêi cheăng”, pôa Trần Thanh Mẫn, Kăn xiâm hnê ngăn Kuô̆k hô̆i tối nhên:

“Kố cho tơdroăng séa ngăn apoăng dêi Kuô̆k hô̆i hneăng má 16; xua mê, cheăng hbrâ rơnáu athế châ pêi pro kơtăng, rơkê tơtro sap ing apoăng. Malối, tơdroăng cheăng séa ngăn rôh kố athế tro ƀă krá tơniăn mâu tơdroăng hnê mơhno cheăng tung la ngiâ dêi Tơnêi têa ‘na hbrâ mơdât kâ kơluâ pro mơhrê liăn ngân, malối cho tơdroăng Pơkâ kơxô̆ 4 dêi Tơnêi têa. Nôkố, tơdroăng pơkuâ ngăn, xúa tíu pêi cheăng klêi kơ’nâi pêi pro troăng hơlâ klâ xoăng kơ koan pêi cheăng dế châ kuăn pơlê tung pơlê pơla kal vâ ‘nâi plĕng khât”.

Ăm rơkong tối ‘na tơdroăng cheăng kuăn pơlê rơhêng vâ khế 5, Vi ƀan Kuăn pơlê rơhêng vâ ƀă Séa ngăn pâ thế Vi ƀan pơkuâ cheăng Kuô̆k hô̆i pâ thế Chin phuh, Ngế pro xiâm hnê ngăn Chin phuh hnê mơhno mâu khu xiâm, kơvâ cheăng ƀă mâu kong pơlê thăm mơdêk lăm ngăn ki lĕm dêi têa kơxăng sinh hok E10, mơdêk rơdêi cheăng tối tơbleăng vâ pro tơdroăng ki tơdâng tơ’mô tung pơla tơbleăng pêi; thăm mơdêk cheăng lăm ngăn ƀă tơrŭm krá tơniăn ƀă Vi ƀan hnê ngăn pơlê kong kân Hà Nội tung tơdroăng tơbleăng pêi, pêi pro mâu tơdroăng tơkêa kân a kong pơlê.

Tung mê, kal ai troăng hơlâ pêi pro nhên vâ tơbleăng pêi mâu tơdroăng tơkêa ăm cheăng pro pơlê ối, vêh xúa vâ tơniăn tung tơdroăng rêh kâ ối ăm kuăn pơlê tung kơpong ki tro tơdjâk xua ing tơdroăng tơkêa. ‘Na tơdroăng ki kal kố, pôa Nguyễn Thanh Hải, Kăn pơkuâ Vi ƀan Khoa hok kong ngê̆ ƀă Hyôh kong prâi tối tiah kố, mê cho tơdroăng ki pơlông, pơklât thế ƀă mâu ngế ki hiăng hên hơnăm, ngế ki hiăng pơtê cheăng kĭ mâu tơkêa ối pơtê vâ tối tơbleăng ăm kuăn pơlê, hlối pơkâ thế mâu kong pơlê ai troăng tơleăng mơnhên ăm tơdroăng kố:

“Plâ rơxông vâi kơdĭng châ to lâi mê, môi tiah khŏm thế nâp ăm kŏng ti hêak kố. Xua mê, tung tối tơbleăng xuân athế mơ’no tối tơdroăng ki kal kố ga cho tơdroăng ki nếo ki tôu. Xuân pơkâ thế kơ koan ki ai tơdjâk mơnhên a kong pơlê dêi mâu cheăm, kong pơlê ki lâi, pin tâng tơdroăng tối tơbleăng há ƀă pin pơkuâ ngăn môi tiah lâi, tŏng gum môi tiah lâi”.

Kal vâ ‘nâi plĕng troh tơdroăng hnê hriâm, pôa Nguyễn Đắc Vinh, Kăn pơkuâ Vi ƀan Túa lĕm tro, Hnê hriâm tối ăm ‘nâi, hdrối nah troăng hơlâ tơnêi têa bu kơdroh ƀă ôh tá êa nâp liăn hriâm ăm mâu kơvâ cheăng môi tiah khu lêng kring vế kuăn pơlê, sư phạm.

“Ai mâu kơvâ cheăng mê kuăn pơlê tá hâi ‘nâi troh môi tiah on tơhrik trếo tik nik dế kal khât, la troăng hơlâ kố tá hâi pro kuăn pơlê hâk vâ mê vâi tá hâi veăng la gá kal khât, mê troăng hơlâ tơnêi têa athế tŏng gum ƀă pêi pro nhên akố cho ôh tá êa nâp liăn hriâm, kố cho tơdroăng kal hnê tối troh lâp lu ăm kuăn pơlê vâ ‘nâi, ai tơ’nôm mâu tơdroăng ki vâ rah xo ăm kơvâ cheăng hnê, ai tơdroăng rah xo ăm tơtro vâ ‘mot tơ’nôm mâu ngế cheăng ăm tơnêi têa”.

Tơpui a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i mơnhên tối khât Vi ƀan Kuăn pơlê rơhêng vâ ƀă Séa ngăn hiăng pơhlêh nếo tung túa chêh pro mơ-éa tối tơbleăng; tơdrêng amê hlối pơkâ thế rêm thế, Vi ƀan tơrŭm cheăng ƀă Măt trâ̆n Tơnêi têa, tíu ki kal ‘nâi nhên hiâm mơno rơhêng vâ, pâ thế dêi kuăn pơlê vâ mơdêk tâ nếo ki rơkê tung chêh pro mơ-éa tơbleăng. Pôa Trần Thanh Mẫn, Kăn xiâm hnê ngăn Kuô̆k hô̆i pơchân:

“Tơdroăng cheăng kuăn pơlê rơhêng vâ trâu rơdâ tâ, ôh tá chiâng pơtê a tơdroăng tơdah kuăn pơlê, tơleăng mâu đơn, pơtroh rơkong pâ thế. Mê á pơkâ thế kuăn pơlê athế cho tíu ki rĕng châ hlo hiâm mơno kuăn pơlê, cho tíu tối tơbleăng troăng hơlâ, cho loăng vê ki rơkê tung pơkuâ ngăn tơnêi têa. Á pơkâ thế tung la ngiâ ah tơmâng ngăn 05 tơdroăng. Môi cho, pôi tá chiâng ăm kuăn pơlê hêng hôu. Pin athế hmâng, ‘nâi nhên tơdroăng ƀă tối tơbleăng hdrối. Péa cho, tiâ rơkong pâ thế dêi kuăn pơlê athế tơdrăng tâ. Tơdroăng ki tiâ rơkong tơdrăng chiâng vâ tơmâng xo, la kế ki vê má mơ’nui ôh tá xê cho hlá mơ-éa tiâ mơnhên, mê cho tơdroăng ki châ lêi tah há lơ ôh, kuăn pơlê hlo hôm tơtro luât há lơ ôh”.

Kăn xiâm hnê ngăn Kuô̆k hô̆i xuân pơkâ thế, séa ngăn tơdroăng kuăn pơlê púi rơhêng vâ athế rah xo tro tíu ki tro kreăng, athế xing xoăng ngăn nhên tơdroăng cheăng. Tơdroăng cheăng ối séa ngăn mê athế tơleăng klêi, pôi tá hmuâ. Tơdroăng hiăng tơleăng tro luât, tâi hnoăng pơkuâ, ôh tá ai tơdroăng ki nếo mê athế mơ-eăm mơhnhôk, tơdrêng amê hlối rak ki kơtăng, pôi tá lôi ton pro ôh tá tơniăn, mơdêk ki rơkê tối tơbleăng tơdroăng kuăn pơlê vâ; athế mơhno prôk pêi, xiâm kối, tíu pôu râng, rơkong pâ thế tơleăng ƀă troăng hơlâ séa ngăn klêi kơ’nâi pâ thế; pâ thế hdrối athế châ séa ngăn, mơnhên tối tung khế kơ’nâi.