Nếo achê kố, kong pơlê Dak Lak tơkŭm po Hôp tơno tơdroăng kal tơdjêp tour ƀă mơnhông tíu troh ôm hyô vâ mơnhên tơmeăm ki ai hlâu mơnhông mơdêk, tơ’lêi hlâu ƀă tơdroăng nôkố dêi kơvâ ôm hyô kong pơlê; tơdrêng amê, po roh hôp tơno vâ mâu ngế ki rơkê, khu ki pơkuâ ƀă khu tê mơdró rơtế tơpui tơno, pơkâ troăng mơnhông ôm hyô krá tơniăn, mơdêk ivá tơbriât cheăng, gum pêi pro pơkâ tơtêk cheăng kâ péa kơxô̆ hneăng hơnăm 2026 – 2030.

A hôp tơno tơdroăng kal, hên ngế ki rơkê ƀă khu tê mơdró mơnhên tơdroăng tơmot chiâng môi tíu mơnhông mơdêk pơla Tây Nguyên ƀă kơpong tơbăng peăng tơdế tơnêi têa hiăng po rôh tơ’lêi kân ăm kơvâ ôm hyô Dak Lak. Ing môi tíu troh ô eăng ƀă kơphế, khôi túa lĕm tro chêng koăng, pơlê, long têa Lắk, Ƀuôn Đôn ƀă kong kế tung kong ki má môi, Dak Lak nôkố ối châ tơ’nôm mâu ki tơ’lêi nếo ing têa kơxĭ, ving, tíu ai hmố lĕm rơtế mâu ki kơnâ khôi túa lĕm tro ƀă kơchâi kâ kơpong tơbăng peăng tơdế tơnêi têa.

Tơdroăng ki tơdjêp pơla têa kơxĭ ƀă kơpong kân rơdâ châ ngăn cho troăng prôk hên tơmeăm vâ mơnhông vâ mơjiâng chiâng mâu tơmeăm ôm hyô tơdjêp kơpong ki phá tơ-ê, pro ton hâi khế ối ƀă pro mơdêk ki châ tâ châ hlo ăm tơmối. Laga, tiô mâu ngế ki rơkê, ki tơ’lêi bu păng ‘nâng mơnhông châ tơƀrê drêng châ pơhlêh chiâng mâu tơmeăm ôm hyô ki má môi, ai tơdroăng ki tơxup tơbriât hên. Pôa Nguyễn Hữu Y Yên, Kăn hnê ngăn Hô̆i đong ối tung mơngế pêi cheăng Kŏng ti pêi cheăng tiô rơnó môi khu Mơdró Prôk ôm hyô Saigontourist tối:

“Klêi kơ’nâi troăng kân ăm phêp rơxế kơtâu têi tơdjêp Pơlê kong kân Hồ Chí Minh troh Tuy Hòa kơdroh ‘nâng ‘nâi u ối 7 chôu. Pro ti lâi vâ Tuy Hòa ai mâu tơdroăng ki hôm, pro tơmối hâk vâ. Pakĭng tơdroăng hum têa kơxĭ môi tiah nôkố mê pin kal mơ’no liăn tơ’nôm mâu kơpong xah hêi kân, râ kân mê tơmối ôm hyô nếo troh a Tùy Hòa’’.

Pakĭng mâu ki tơ’lêi hlâu, mâu kăn teăng mâ xuân mơhno hên tíu ki kreăng dế mơdât tơdroăng mơnhông mơdêk dêi kơvâ ôm hyô môi tiah hngêi trăng troăng klông tá hâi tơdâng tơ’mô, dâi lĕm tơdroăng mơdró tá hâi tơxâng ƀă tơmeăm ki ai hlâu, tơdroăng pro ăm mơnhông rĕng tâ mơđah tơbleăng ối kơdroh ƀă tơdroăng xúa kŏng ngê̆ kơxô̆ tá hâi tơxâng pơkâ mơnhông tung tơdroăng rêh ối nếo nôkố. Hên rơkong tơpui pâ thế kong pơlê kal ai troăng pêi krê vâ mơhnhôk mơ’no liăn cheăng pro troăng klông, hngêi trăng ôm hyô, tŏng gum khu tê mơdró mơjiâng tơmeăm nếo ƀă po rơdâ mâu troăng ôm hyô, tour ki tơdjêp.

Tung tơdroăng ki mơnhông ôm hyô krúa lĕm, rơkê ƀă krá tơniăn, Dak Lak châ pói tơngah kô xúa châ tơƀrê tíu mơnhông mơdêk nếo vâ mơjiâng mâu tơmeăm djâ ki krê, gum mơdêk tíu pêi cheăng tung lơgât ôm hyô tơnêi têa. Tơmâng xo rơkong tơpui a hôp tơno tơdroăng kal, pôa Đào Mỹ, Phŏ Kăn hnê ngăn Vi ƀan kong pơlê Dak Lak tối ăm ‘nâi kong pơlê kô tơkŭm pêi pro mâu troăng pêi ki xiâm vâ tŏng gum khu tê mơdró ƀă mơnhông tíu troh.

“Mơjiâng lơgât tíu troh dêi ôm hyô cho má môi. Má péa nếo cho ai troăng hơlâ tŏng gum po tour, vâ mơjiâng tíu troh. Pro châ môi tiah mê mê khu tê mơdró nếo hmiân tuăn loi tơngah a po tour, mơjiâng tíu troh vâ mơhnhôk tơmối ôm hyô”.

Ôh tá xê to pơtê a mâu troăng prôk la ngiâ ton xŏn, hôp tơno ối mơnhên mâu troăng prôk ki nhên vâ mơdêk tơdjêp mơnhông ôm hyô. Khu pơkuâ Khôi túa lĕm tro, Tơ’noăng ivá ƀă Ôm hyô kong pơlê Dak Lak hiăng kĭ tơkêa tơdroăng tơrŭm ƀă mâu khu tê mơdró pêi ôm hyô; tơdrêng amê mâu khu tê mơdró ôm hyô, tíu ối, kơpong tíu ôm hyô, hngêi tê mơdró tơmeăm ƀă tíu pơto tơmối xuân kĭ tơkêa môi tuăn tơdjêp, pêi pro troăng hơlâ kơjo ‘na yă ƀă mơdêk tơdroăng pêi ôm hyô vâ mơdêk tơdroăng ôm hyô.

Troăng prôk la ngiâ tơdjêp kơpong xuân dế châ hên kong pơlê mơdêk pêi pro. Nếo achê kố, Lâm Đồng ƀă Khánh Hòa xuân hiăng tơkŭm po tơdroăng tơdjêp pêi pro ăm rĕng mơ’no liăn cheăng, tê mơdró ƀă ôm hyô hơnăm 2026, po rơdâ ai roh tơ’lêi tơrŭm cheăng pơla Tây Nguyên ƀă kơpong tơbăng peăng tơdế Tơnêi têa. Péa kong pơlê hiăng kĭ 8 mơ-éa chôu vế tơrŭm cheăng pơla mâu khu tê mơdró vâ pêi pro rĕng mơ’no liăn cheăng, tê mơdró ƀă ôm hyô. Drêng Khánh Hòa cho tíu xiâm cheăng kâ tê kơxĭ ƀă hngêi trăng troăng klông ôm hyô mơnhông mơdêk, mê Lâm Đồng pơkuâ ki tơ’lêi ‘na kong prâi, ôm hyô ngăn loăng pơlái kong kế, pơtê xah hêi ƀă pêi chiâk deăng xúa kŏng ngê̆ rơxông nếo. Tơdroăng ki tơdjêp ƀă mâu troăng ki xiâm môi tiah Troăng kân tơnêi têa 1, troăng kân ăm phêp rơxế kơtâu têi Peăng Kơnhŏng - Peăng hdroh, Troăng kân tơnêi têa 27C, troăng rơxế lơtreng peăng Kơnhŏng – peăng Hdroh rơtế kơno têa kơxĭ ƀă tơƀai kơneăng dế pro tơ’lêi hlâu vâ mơjiâng mâu tơmeăm ôm hyô, po rơdâ tíu mơnhông mơdêk ƀă mơhnhôk mơ’no liăn cheăng.

Ing kơpong kân rơdâ troh têa kơxĭ ngiât lĕm, tơdroăng ki tơdjêp pơla mâu kong pơlê Tây Nguyên ƀă kơpong tơbăng peăng tơdế tơnêi têa dế po tíu mơnhông mơdêk nếo ăm ôm hyô. Drêng mâu tơdroăng ki tơ’lêi krê châ tơdjêp chiâng ivá ó rơdêi tơdjuôm, kố kô cho tơdroăng mơdêk ki kal vâ kơpong rơtế mơnhông châ tơƀrê hluâ pơkâ, veăng gum tung mơjiâng mơ-eăm xêh dêi tơná dêi tơnêi têa tung chal nếo.