Tiah mê, cheăng rôu tăng, tơkŭm kơxêng kiâ mố đô̆i kô châ tơbleăng pêi tiô 3 hneăng. Hneăng má 1 sap ing hâi lơ 6/6 troh lơ 20/6, mâu khu lêng tí tăng tơkŭm a mâu kơpong tơnêi ki ôh tá ai hngêi trăng kuăn pơlê tung plông ilâng kiâ mố đô̆i bêng Đắk Cấm ƀă tăng ngăn a troăng Trường Chinh sap ing kơxô̆ hngêi 206 troh kơxô̆ hngêi 282. Hneăng má 2 sap ing hâi lơ 21/6 troh lơ 25/7, po rơdâ chiâ tăng a mâu tíu ki u ối dêi troăng Trường Chinh ối tung kơpong ki nhôm ai kơxêng kiâ mố đô̆i. Hneăng má 3, sap ing hâi lơ 26/7 troh tâi hơnăm 2026, tơkŭm tăng ngăn chiâ a mâu tíu ki nếo tâng kuăn pơlê, mố đô̆i hneăng hdrối, kơ koan ki ai tơdjâk troh tối ai tơnâp kiâ mố đô̆i hlâ.

Tung pơla tí tăng athế pêi pro kơtăng tiô túa pơkâ “ ‘nâi ai troh alâi, tăng troh amê, tơ’lêi tăng hdrối, xơpá tăng ‘nâi, kơchăng, krâu”, rak tơniăn ‘na mơngế, rơxế, kế tơmeăm, troăng klông kih thuât, tơniăn a troăng prôk. Mâu hâi hdrối, Đô̆i K53 hiăng chiâ a kĭng troăng, pơtăng ƀă tíu xiâm troăng Trường Chinh, bêng Đăk Cấm. Hdrối mê, Đô̆i K53 hiăng chiâ mâu kĭng séa ngăn tung kơdrum ilâng kiâ mố đô̆i bêng Đắk Cấm, lêa, klâ lối 1.000m3 tơnêi vâ tăng tơ’nôm mâu tíu ki ai tơdjâk troh kơpong ai tơnâp kiâ mố đô̆i, gum ăm cheăng tí tăng, tơkŭm kơxêng kiâ mố đô̆i hlâ.