Tơ’noăng chêh hlá tơbeăng kong pơlê Dak Lak rôh kố ai 115 ƀai ối tung 5 khu chêh hlá tơbeăng in, hlá tơbeăng điê̆n tưh, ƀai chêh tơpui tung rơ’jíu, um tơvi ƀă um hlá tơbeăng châ mot tung rôh chung khảo. Khu tơkŭm po hiăng rah xo diâp 61 pri, ai 4 pri A, 8 pri B, 20 pri C ƀă 29 pri Mơhnhôk. Tiô Khu tơkŭm po, mâu ƀai veăng tơ’noăng hơnăm kố chêh tiô tơdroăng nôkố, troh lâp lu ki kơnâ lĕm, châ hlo mâu troăng pêi rơkê, troăng tơmiât pêi rơkê; tơdrêng amê gum tơplâ ƀă mâu tơdroăng ki ôh tá lĕm, rak xiâm rêi tuăn ihiâm mơno dêi Đảng.

Ki rơhêng vâ tối, klêi kơ’nâi tơmot chiâng môi, tơdroăng ki xiâm ƀai chêh rế po rơdâ, chêh tối inhên tơdroăng rêh ối nôkố kơpong kong ngo kân rơdâ troh kơpong têa kơxĭ. Tung mâu kơ koan châ kâ pri hơnăm kố, Kơ koan teăng mâ Kơpong Tây Nguyên - Rơ’jíu Việt Nam ai 6 ƀai châ diâp pri, mê cho 1 pri A, 1 pri B, 2 pri C ƀă 2 pri mơhnhôk.