Khĕn kơdeăn ‘nâi hbrâ rơnáu hdrối tŭm tơdroăng, tăng ‘nâi plĕng dêi Khu cheăng kal kí ƀă mơhnhôk xiâm tơnêi têa drêng mơjiâng tơdroăng hbrâ chêh Tơdroăng tơkêa bro vâ tŭm tâi tâng, ai hên tíu ki nếo ‘na tuăn tơchĕng tơmiêt, túa vâ pêi ƀă troăng hơlâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, tơdroăng mơjiâng troăng hơlâ tuăn tơmiât dêi Đảng tung tơdroăng cheăng pơ’lêh kơxô̆ cho tơdroăng kal thế ai, kal pêi tơdrêng hlối ai pơxúa ton.

Pôa Tô Lâm tối nhên, Tơdroăng tơkêa bro kal mơnhên tơdroăng pêi tung pơla pêi pro, mê cho: pro tơdâng – xêt – rơdêi – Mơnguăn - Tơbrê”. Ing mê, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế, Tơdroăng tơkêa bro kal tơmâng pêi 4 tơdroăng hnê mơhno kân, tung mê, thế rak tuăn tơmiât ki tro xiâm tuăn mơno dêi Đảng, hlối hơ’lêh nếo rơdêi troăng pêi ‘na tuăn mơno. Rak tuăn tơmiât ki tro, ôh tá tro hyông troăng; hơ’lêh nếo vâ pôi tá ton tơrŏng. 

Tơdroăng tuăn ngôa rế mơhno ki nếo nôkố ‘na tơdroăng pêi pro, thăm rế krá kak ‘na kal kí, tuăn mơno, troăng pêi ƀă tơdroăng pêi. Pôa xuân po mơhno 8 khu tơdroăng cheăng ki kal vâ pêi klêi tơdroăng tơkêa bro. ‘Na ki ton ta ah, pôa Tô Lâm xuân pơkâ thế, hơ’lêh nếo tơdroăng hnê hriâm tơpui leăng tơdroăng kal kí, hriâm tâp tiô hlá mơ-éa chêh pơkâ tiô troăng pêi tro. Xiâm gá pro ăm tơdroăng hriâm tơpui leăng, hriâm tro tiô troăng ki khât tâ, rơtế ƀă tơdroăng cheăng pêi tâ; hriâm vâ hlê trâu, xúa tro, pêi pro môi tuăn, pro tro troh lui.