Ƀă inâi “Tơrŭm cheăng ôh tá ai tíu mơdât”, Rôh hôp ai pŭn hneăng hôp tơno ‘na mâu inâi Tơrŭm cheăng ‘na Kong ngê̆ thong tin ƀă Tuăn ngoâ rơkê kuăn mơngế pro tơkâ luâ tíu tơkăng kong: Kong ngê̆ liăn ngân ƀă pơlê kong kân rơkê; Tê mơdró lâp plâi tơnêi: Rak vế tơniăn tŭm kế kâ, pơto chơ tơmeăm ƀă tơdjêp logistic pơla Rusi ƀă mâu kong têa ASEAN, tơrŭm ‘na on tơhrik, troăng klông ƀă kơmăi kơmok; ƀă mâu túa tơrŭm cheăng tơnêi têa – tơdroăng khôp a Rusi ƀă ASEAN.

Tung ƀai pơchuât pơxiâm po Rôh hôp, pôa Lê Minh Hưng, Ngế pro xiâm hnê ngăn tơnêi têa hiăng tối 3 troăng pơkâ pêi kal thăm mơdêk mâu rôh po hôp tơrŭm cheăng pơhlêh nếo, tŏng gum khu mơdró kâ kơmăi kơmok ƀă khu mơdró kâ hơnăm ối nếo, mơjiâng tơdroăng cheăng pơhlêh nếo tơmiât pêi rơkê, tơdjêp kơhnâ tơniăn pơla khu mơdró kâ péa pâ.

Ngế pro xiâm hnê ngăn tơnêi têa tối rơdêi, Việt Nam kông tơdjêp, veăng gum thăm mơdêk tơrŭm cheăng tê mơdró ƀă ‘no liăn pêi cheăng pơla ASEAN ƀă kong têa Rusi, ing mê pro tơdroăng ki ai hlâu chiâng tơdroăng tơkêa bro ki kal, pro chiâng tơdroăng tơdjêp chiâng rôh tơ’lêi hlâu tung tê mơdró, ƀă pro hiâm mơno loi khât chiâng ivá pêi pro thăm mơdêk nếo.