Klêi môi khế pêi pro, tâi tâng Khu hiăng mơhnhôk vâ chê 762 rơtal liăn, châ 152% pơkâ mơ’no, tŏng gum vâ chê 579 rơpâu ngế ai tơdroăng rêh ối pá puât, mâu ngế ki ôh tá hro tung lâp tơnêi têa. Sap ing Leh mơhnhôk râ tơnêi têa a Hà Nội, kơpeăng kŏng tuăn pâ hiăng troh lâp lu drêng tơdjêp tơdrêng tá troăng hyôh măng troh lối 3.000 tíu hrik hyôh ƀă mâu troăng pêi “Pơlê pơla tuăn pâ – Tơdjêp tơdroăng tuăn pâ’’ a Tuyên Quang, Nghệ An, An Giang.

Troăng pêi cheăng “Pơlê pơla tuăn pâ  - Tơdjêp tơdroăng tuăn pâ” a pái kong pơlê tíu châ pêi pro ƀă ki kơnâ lối 4,4 rơtal liăn, tơkŭm mơjiâng hngêi Khu lo tŏng veăng, tŏng gum hok tro ƀă rơpŏng kơtiê. Pakĭng mê, 1.750 kơxuô tơmeăm kơnâ 3,5 rơtal liăn xuân hiăng hbrâ vâ kơ-êng kuăn pơlê ki tro tơdjâk xua kong prâi pro ôh tá tơniăn ƀă tơdroăng rêh ối pá puât.

Mâu tơdroăng châ tơƀrê dêi Khế tŏng gum mơngế pá puât hơnăm 2026 cho tơdroăng mơnhên ăm tuăn ihiâm mơno tơrŭm môi tuăn, tiô ki lĕm vâi krâ nah tŏng gum dêi pó dêi hdrông mơngế pin.