A cheăm Tuy An Đông, mâu lêng kŏng an, mâu lêng rơtế ƀă mâu kăn cheăm djâ kơmăi, tơmeăm vâ pêi veăng kum mâu rơpŏng kuăn pơlê hngêi rơpŏng pêi tro tiô tung tơdroăng tơkêa bro mơjiâng troăng têa kơxĭ djâ dêi tơmeăm khoăng lăm ối a tíu pro pơlê nếo. Mơhé hngêi hâi teăm kêi, hên rơpŏng kuăn pơlê xuân prôk xêh djâ dêi tơmeăm, pơcháu tơnêi hngêi ton vâ ăm khu mơjiâng tơmeăm khoăng vâ pro.

Pôa Phạm Chí Bảo, ối a cheăm Tuy An Đông ăm ‘nâi, rơpŏng hngêi pôa vâ pơcháu tơnêi hngêi ƀă púi vâ ai troăng prôk rĕng châ pro klêi, pro hlâu ăm pro troăng prôk ƀă mơnhông kong pơlê.

“Á xuân vâ rĕng pơcháu tơnêi ăm tơnêi têa pro troăng ăm mơngế prôk ƀă rơxế kơtâu ti mê tê”.

Vâ tơniăn tơdroăng pơcháu tơnêi ki xŏn dêi troăng lối 22km dế pro, mâu cheăm dế pơtối tơdroăng pêi pro ahdrối dêi kăn ƀô̆, đảng viên. Rơpŏng pôa Nguyễn Văn Hiếu, Kăn ƀô̆ cheăm Tuy An Đông, cho môi tung mâu rơpŏng djâ dêi tơmeăm lăm ối tíu ê mơhé tơdroăng vế hdró riân ngăn hâi klêi tâi tâng.

“Rơpŏng hngêi nếo riân dêi tơmeăm la xuân mơhnhôk thế dêi kơdrâi kuăn ‘nĕng rak vế pêi pro tro luât pơcháu tơnêi rĕng ăm mâu tíu pêi cheăng vâ rĕng pro troăng tiô tơdroăng tơbleăng dêi Khu pơkuâ hnê ngăn Đảng kong pơlê ƀă Vi ƀan kuăn pơlê dêi kong pơlê”.

Nôkố hên mâu tơmeăm khoăng ‘no liăn pro tung kong pơlê Dak Lak dế hrá pro xua tơvâ tơvân ‘na xo tơnêi vâ pro. Krê troăng kân kĭng têa kơxĭ ai dâng 1.500 rơpŏng kuăn pơlê tro tơdjâk ‘na tơnêi, hngêi ối. Xua mê, tơdroăng pêi cheăng “30 hâi măng’’ châ ngăn cho tơdroăng cheăng ki kal dêi mâu cheăm, bêng tíu ai tơdroăng tơkêa bro tơkâ luâ. Tơdrêng ƀă hnê tối, mâu kong pơlê ối tơbleăng luât pơkâ kơjo kum, khĕn kơdeăn ƀă mâu rơpŏng ki rĕng pơcháu tơnêi. Pôa Trần Văn Biên, Kăn hnê ngăn Vi ƀan kuăn pơlê cheăm Tuy An Đông ăm ‘nâi.

“Hnê tối vâ ai tuăn loi ƀă kuăn pơlê ƀă hnê tối mâu luât pơkâ tŏng gum, tơdroăng khĕn kơdeăn tiô hlá mơ-éa pơkâ 26 dêi Vi ƀan kuăn pơlê dêi kong pơlê, tung mê, ai tơdroăng kơjo kum mâu rơpŏng ki rak vế pêi pro tro luât hdrối cho sap 8 rơtuh troh 15 rơtuh liăn”.

Kong pơlê Dak Lak pơkâ pro klêi tơdroăng xo tơnêi gu tơbăng vâ pro troăng kân kĭng têa kơxĭ hdrối hâi lơ 31/8/2026. Krê pơla troăng vâ chê 1km peăng kơnhŏng kông An Hải tơkâ luâ cheăm Tuy An Đông pê klêi hdrối hâi lơ 30/6 la ngiâ.

Vâ tơniăn tơdroăng mơjiâng pro, mâu tíu pêi cheăng kô tơbleăng pêi tiô tơdroăng pêi troh alâi klêi troh amê. Pôa Nguyễn Khoa Anh, kăn teăng mâ Khu rak ngăn mâu tơdroăng tơkêa bro ‘no liăn mơjiâng tơmeăm khoăng kơpong Peăng mâ hâi lo kong pơlê Dak Lak ăm ‘nâi:

“Kong pơlê pơcháu tơnêi troh dâng lâi, Khu rak ngăn tơdroăng tơkêa bro kô thế khu mơjiâng pro tăng hên tơmeăm pêi vâ tơbleăng pêi hlối, tơniăn tơdroăng pêi pro tơmeăm khoăng”.

Ƀă tơdroăng mơ-eăm dêi mâu kăn rơtế môi tuăn dêi kuăn pơlê, tơdroăng pêi pro mê hiăng pơ’lêh nhên a mâu cheăm kĭng têa kơxĭ. Mâu tíu vâ pro châ pơcháu hâi kố kố veăng ‘no hnoăng pro kêi troăng kĭng têa kơxĭ lĕm, po troăng mơnhông cheăng kâ a têa kơxĭ ăm Dak Lak tung la ngiâ.