A rôh tơdah, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối, Đảng, Tơnêi têa ƀă kuăn pơlê Việt Nam nhoăm tơrŭm cheăng ƀă kong têa Alơmăng, đi đo ngăn Alơmăng cho kong têa tơrŭm ƀă ki kal má môi dêi Việt Nam a châu Âu. Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên mâu troăng tơrŭm cheăng pơla péa tơnêi têa tung la ngiâ, tung mê, kal ‘mâi mơnhông loi nhoăm kal kí ing tơdroăng tơpui tơno tâi tâng khu, trâm mâ mâu râ kăn xiâm má môi mâu ƀâng Đảng, Tơnêi têa ƀă Kuô̆k hô̆i, kơhnâ xúa Tơdroăng tơrŭm cheăng tê mơdró tơniăn hlâu xua Việt Nam- EU (EVFTA) vâ rĕng mơdêk tê mơdró pơla péa pâ luâ 20 rơtal USD, pơtối rak tơdroăng ki péa tơnêi têa cho kơchơ tê mơdró má môi dêi rơpó a châu Âu ƀă ASEAN; hlối ôh tá la lâi pơtê mơdêk tơrŭm cheăng  ki khât, pơxúa ing mâu kơvâ cheăng pơrá phá mê cho khoa hok kong ngê̆, hơ’lêh hriăn plĕng ki nếo, hơ‘lêh pêi cheăng tung măng, cheăng kâ lĕm krúa, cheăng kâ pơ’lêh klêng tê.

Phŏ  kăn xiâm hnê ngăn Kuô̆k hô̆i Alơmăng vâ môi tuăn ƀă Kăn xiâm hnê ngăn Đảng, Kăn xiâm hnê ngăn tơnêi têa ‘na tơdroăng  mơdêk trâm mâ pơla kuăn pơlê, mơhno túa lĕm tro, pơtối rak ki môi tuăn tung kuăn pơlê lối 200.000 ngế Việt Nam a kong têa Alơmăng xuân môi tiah mơngế Việt Nam hiăng hriâm, pêi cheăng a kong têa Alơmăng vâ ‘mâi mơnhông tơrŭm cheăng krá pơla péa pâ.