Tung tơdroăng rêh ối kơhnâ rơkê dêi Pơlê kong kân Hồ Chí Minh, mâu kong măng mơ’nui măng tĭng achê kố, hên tơmối kong têa ê ƀă kuăn pơlê pơlê kong kân mê vâi tí tăng mâu tơdroăng ki lăm ngăn phá krê xêh. Ôh tá xê troh a tíu xiâm tê mơdró lơ kơphô̆ prôk chêng, mê vâi ‘nân ối môi tíu tung ngê̆ thuât vâ hmâng mâu idrâp chuât xơtó dêi hdrông mơngế Việt Nam, châ hơ’măn ing nâl tơpui tiô chal nôkố.

Akố, idrâp proâ kơlá, têng nêng, proâ nhĭ, proâ t’rưng, proâ tơnĭng lơ mâu idrâp chêng koăng Tây Nguyên chuât xơtó tung idrâp 3D chal nôkố, djâ tơmối mot tung tơdroăng ki tí tăng túa lĕm tro Việt Nam, sap ing Kơnhŏng mot tung Hdroh. Lối 30 túa proâ hdrông kuăn ngo rơtế ƀă 12 mâu ƀai ki vâi chêh pro tiô chal nôkố hiăng vêh mơhno ki lĕm dêi hên kơpong tơnêi, pro chiâng môi rôh ki châ hmâng rế cho tơdroăng ton nah rế cho tơdroăng ki nếo.

Mê cho tơdroăng ngê̆ thuât “Chào Show”, po a kơxô̆ 6 Nguyễn Siêu, bêng Sài Gòn, Pơlê kong kân Hồ Chí Minh. Troh nôkố, tơmối ôh tá xê to châ hmâng tơdrá proâ, mê ối châ kâ mâu kế kâ dêi pái kơpong Peăng Kơnhŏng – Peăng Tơdế - Peăng Hdroh. Ki tơrŭm mê pơla tơdrá, um ƀă kế kâ, pro ăm rêm kong măng mơđah chiâng môi rôh lăm tí tăng túa lĕm tro Việt Nam ing hên tơdroăng.

Pơtối ‘ngrâu dêi châ hmâng mâu tơdrá proâ, pôa Edgar, tơmối lo ing Canada tối, pôa hiăng lăm hên tíu a Việt Nam la kố cho rôh apoăng châ hmâng ƀă châ ngăn hlo hên mâu proâ ki vâi tŏn, vâi rêi rơtế môi xôh. Pôa tối tiah kố mê cho môi rôh ki châ hmâng hơniâp ro khât.

“Tâng vâ tối khât, á hâk vâ khât. Á ôh tá tơchĕng tơdroăng kố mê gá xúa hên mâu proâ môi tiah kố. Tơdroăng ki pro á hâk vâ má môi mê cho hên proâ mê á rôh apoăng châ ngăn hlo ƀă châ hmâng. Tơdroăng ki châ hmâng hên mâu tơdrá proâ phá dêi rơpó la tơrŭm rơtế cho môi rôh ki châ hmâng ro khât. Rôh kâ hmê hâi kố xuân kơhiâm, ai hmê, ai kơƀăn mi ƀă ai hên mâu kế kâ ki ê dêi Việt Nam”.

Tung pơla mê, nâ Zamanie, tơmối kong têa Mih, ăm ‘nâi tơdroăng kố luâ tơdroăng nâ tơmiât drêng gá pro ăm bâ eăng mâu tơdroăng ‘na túa lĕm tro ƀă kuăn mơngế Việt Nam ing mâu tơdrá proâ. Tơdroăng ki hâk mơnâ má môi ƀă nâ cho ivá pêi cheăng dêi mâu ngê̆ sih ki mơđah a plông.

“Á ‘nâi troh akố cho kơnôm ing tí tăng tung măng, á hlo tơdroăng kố gá ai hên mơnhên tối ƀă ro, mê á chiâng lăm troh hmâng. Ƀă ki khât, tơdroăng ki ro má môi ‘na mâu tơdroăng klâi ki á tơmiât. Klêi kơ’nâi ngăn vâi mơđah, á chiâng vâ tối tiah kố á tâ hâk vâ khât. Malối hâk vâ ‘na tơdrá proâ, tơdroăng ki mơđah tơbleăng dêi mâu ngê̆ sih ƀă rôh ki tơmối ngăn ki mâu khu mơđah tơbleăng djâ vế. Á xuân hlo tiah kố tơdroăng kố hiăng ‘măn chôu môi tơdroăng ki lĕm ‘na mâu kơpong tơnêi ƀă túa lĕm tro phá dêi rơpó dêi Việt Nam ing mâu tơdrá proâ ƀă tíu mơđah tơbleăng”.

Tiô pôa Trần Minh Hoàng, Kăn pơkuâ khu mơdró “Chào Show”, túa tơmiât mợiâng pro kố cho sap ing tơdroăng púi rơhêng vâ ai môi tơdroăng ôm hyô a kong măng nếo ƀă Pơlê kong kân Hồ Chí Minh. Teăng ăm po mơđah hơdruê xuăng hdrông kuăn ngo tiô mâu khôi hmâ, ê-kíp rah xo túa ki vâ mơđah tiô chal nôkố vâ djâ túa lĕm tro Việt Nam troh achê ƀă kuăn pơlê, malối cho tơmối kong têa ê.

“Rơhêng vâ kân má môi dêi ngin cho tơdjâk tơdrá proâ ƀă túa lĕm tro Việt Nam troh ƀă mâu vâi pú kong têa ê xuân môi tiah mâu tơmối tung tơnêi têa. Châ tơkŭm po đi đo rêm kong măng, ngin xuân tơngah “Chào Show” kô chiâng môi tíu troh ‘na túa lĕm tro phá tơviah krê ƀă iâ ai a Pơlê kong kân Hồ Chí Minh vâ mơđah ăm tơmối ngăn. Xua mê, ngin xuân mơnhên Show mơđah môi tiah ‘na môi tơdroăng ki teăng mâ, veăng gum pro tơdjâk ‘na tơdrá proâ ƀă túa lĕm tro Việt Nam troh ƀă mâu kong têa lâp plâi tơnêi”.

Sap ing pơxiâm mơđah tơbleăng a khế 3/2025, tơdroăng kố hiăng châ xo ‘na ki tối tơbleăng hên ing mâu tơmối. Nôkố, “Chào Show” hiăng tơdah lối 30.000 ngế tơmối; tung mê, ai vâ chê tơdế ngế tơmối cho kong têa ê.