Lăm ngăn túa ki mơdâ pêt tiô túa cheăng, hên kuăn pơlê, kăn ƀô̆ hnê mơhnhôk pêi chiâk pêi deăng mâu kong pơlê a Tây Nguyên châ hlo tơtro khât ƀă túa ki pơkuâ ngăn kơdrum loăng tiô tơdroăng ki pêt tơdjuôm. Ing tơdroăng pơkuâ ngăn ‘na trếo ki dâi lĕm, têa tôh troh a cheăng hbrâ mơdât oâ hdrong pơrá châ pêi pro môi tiah, ai hnoăng ki tơveăng gum dêi kơmăi kơmok chal nếo, kŏng ngê̆ kơxô̆ ƀă mâu phân mêm ki vâ pơtâng tối ‘na hyôh kong prâi tô mêi. Pôa Nguyễn Văn Một, kuăn pơlê ki pêt loăng plâi sầu riêng a cheăm Quảng Phú, kong pơlê Dak Lak ăm ngin ‘nâi, tơdroăng ki pro pôa rơhêng vâ tí tăng ‘nâi má môi mê cho túa cheăng ki ôh ta xê tối tơbleăng môi kih thuât ki krê xêh mê mơjiâng tâi ing apoăng troh mơ’nui lui, cho ing mơdâ pêt, rak ngăn, krí plâi, tê mơdró. Kuăn pơlê xuân chiâng vâ ngăn, vâ hlo nhên, hlo tơdrêng amê ki dâi lĕm a kơdrum vâ mơhriâm ƀă xúa pêi pro ki păng ‘nâng.

“To lâi hơnăm mê hía nah, á pêt mơjiâng plâi ga dâi lĕm, khu mơdró pá kong ôh tá ai kơbố hjăm, phon rơvât, pơkeăng xôh á xuân rah xo ki dâi lĕm, tro tiô hâi khế hơnăm. Á pơtối mơhriâm thăm nếo vâ chiâng pêi pêt, rak ngăn tơtro khât tâ. Á hlo dêi tơdroăng rak ngăn mê hiăng chía dâi á phiu ro ‘nâng, á hiăng ai hên túa cheăng ki vâ pêi pro”.

Tung pơla kơvâ pêi pêt plâi sầu riêng ƀă kơphế Tây Nguyên dế trâm pá ƀă hên tơdroăng ki kal athế pêi pro tiah dế nôkố, trối hyôh kong prâi ôh tá tơniăn, oâ hdrong thăm rế xông tâ tú hên, tơdroăng pơkâ thế rế hiá rế kơtăng ahdrối vâ mơ’no tê ăm mâu kong têa vâi ê, túa ki mơjiâng túa pêi pêt, rak ngăn hnối pêi adrêng ƀă hnê tối ‘na kih thuât châ ngăn cho troăng pêi pro ki kal păng ‘nâng.

Tiê̆n sih Phan Việt Hà, Phŏ ngăn Viê̆n pơkuâ ‘na Chiâk deăng-Pêt kong Tây Nguyên tối ăm ngin ‘nâi, túa cheăng mơdâ pêt-rak ngăn kố châ mơjiâng tiô troăng ki rơkê, tơtro má môi tung tâi tâng tơdroăng pêi chiâk pêi deăng, pơhlêh lôi túa ki tơkŭm pêi pro iâ êt, krê ukố utá. Ki xiâm mê cho rak ngăn ivá dêi hdrê loăng pêt ki tơdjuôm, xúa têa tro tơdroăng, rak vế ki dâi lĕm dêi trếo tơnêi, mơdât ki lối hên trếo ki krêa a plâi, ƀă athế xúa kŏng ngê̆ kơxô̆ tung pơkuâ ngăn tơdroăng pêi pêt, rak ngăn, krí xo.

Ki xiâm dêi tơdroăng mê ôh tá xê to bu pêi châ hên plâi mê ối gum kuăn pơlê tung mơdâ pêi pêt, rak ngăn athế kơdroh kơxô̆ liăn ki mơ’no pêi, gum ăm hdrê loăng vâ, tơtro ƀă tơdroăng ki hyôh kong prâi pơhlêh ƀă hnối tơtro ƀă  mâu hnoăng ki tơxâng vâ chê tê mơ’no ăm kong têa ê troh tiô tơdroăng ki kong têa vâi ê rơhêng vâ rôe. Tiô Tiê̆n sih Phan Việt Hà tối, kố cho mâu tơdroăng ki kal xiâm vâ kơvâ mơdâ pêt, rak ngăn loăng plâi sầu riêng ƀă kơphế châ mơnhông krá tơniăn ton tung la ngiâ.

“Mâu kơdrum loăng ki pin hiăng xúa pêi pêt mê ga ai hên, tơtro ƀă kih thuât. Ngin hiăng ai môi túa cheăng ki hê mơhno  ‘na túa pêi pêt, rak ngăn loăng plâi sầu riêng krá tơniăn ton. Kố xuân cho túa cheăng ki ngin pói rơhêng vâ tơrŭm pơla 4 khu. Tung túa cheăng ki kố, ngin rơhêng vâ mơjiâng tơdroăng tơrŭm tâi tâng mâu troăng hơlâ khoa hok kih thuât dêi mâu khu râ ki tơrŭm cheăng dêi pó”.

Môi tơdroăng ki kal athế tơtrŏng má môi mê cho tơdroăng ki veăng tơrŭm cheăng dêi hên khu, ing kơ koan pơkuâ ngăn dêi tơnêi têa, khu ki hriăn plĕng ‘na cheăng khoa hok troh a khu râ ki ngăn ‘na hnê mơhnhôk tơdroăng cheăng ƀă mâu khu râ ki veăng gum pêi pêt, rak ngăn, Ki tơrŭm dêi tơdroăng cheăng kố pói tơngah kô châ kơdroh ki kơtăn pơla hriăn plĕng ƀă tơdroăng ki ai păng ‘nâng.

Pôa Lê Quốc Thanh, Ngế ngăn Tíu xiâm Hnê mơhnhôk pêi Chiâk deăng Tơnêi têa tối mơnhên,  môi túa cheăng méluâ rơkê tro ó troh tơkéa lâi xuân bu xiâm châ mơnhông ki kơnía dêi tơdroăng hnê mơhriâm kân rơdâ ƀă châ kuăn pơlê hlê plĕng, xúa tung tơdroăng pêi chiâk pêi deăng.

Tiô pôa Thanh, khu hnê mơhnhôk chiâk deăng kô kum hnoăng cheăng tơrŭm pơla khu hriăn cheăng ‘na khoa hok ƀă kuăn pơlê, gum mâu tơdroăng ki rơkê ‘na kih thuât châ lân rơdâ rĕng tâ kơnôm ing tơdroăng po lâm hriâm, hnê djâ pêi tơdrêng ƀă hnối hnê kuăn pơlê a mâu chiâk deăng. Drêng rêm pâ veăng pêi pro mâu hnoăng cheăng krá tơniăn tiah mê, mâu túa cheăng ki mơdâ pêt, rak ngăn krá tơniăn ton mê nếo châ pơtối po rơdâ ƀă pro pơxúa păng ‘nâng ăm mơngế ki pêi chiâk pêi deăng.

“Vâ tơniăn ăm tâi tâng mâu tơdroăng pơkâ thế ki kơtăng khât dêi kơchơ kong têa ê, mê la ngiâ kố ah, kuăn pơlê pêi chiâk athế tí tăng xêh troăng hơlâ vâ pêi pro. Ngin xuân pói rơhêng vâ vâi krâ rơtế ƀă khu râ hnê mơhnhôk tơdroăng chiâk deăng pêi pro ti lâi vâ hnê mơhno tối hên tâ nếo tơdroăng ki rơkê plĕng ing mâu túa cheăng ki ngin hiăng hnê tối”.