Cho môi tung mâu khu mơdró kâ ki uâ pơliê mơdiê, tê mắc ca ngi kong têa ê ki xiâm a Dak Lak, Kŏng ti Damaca Nguyên Phương tối mâu tơdroăng pơkâ ‘na krúa lĕm ƀă séa ngăn ‘na pơreăng ki krêa a mâu kế tơmeăm, kế kâ SPS tung Tơkêa Kong têa tơrŭm cheăng kâ Tung tâi tâng Kơpong RCEP lơ mâu pơkâ thế nhên ‘na kih thuât nếo dế chiâng tơdroăng ki kal rêh lơ hlâ vâ mâu kế tơmeăm châ rak kơchô tê mơdró. Hlo tơdroăng pơkâ thế rế hía rế xơpá sap ing mâu kong têa, khu mơdró kâ athế hbrâ rơnáu tối tơbleăng tơdroăng kal, ‘mâi rơnêu túa pêt mơjiâng vâ pêi châ tơdroăng ki pơkâ thế roê ‘mot tung tơnêi têa . Tiô jâ Nguyễn Thị Thu Phương, Kăn pơkuâ kŏng ti, xơpá nôkố ôh tá xê “ ‘nâi pơkâ” mê cho tơbleăng tro ƀă tŭm tung tơdroăng ki ai khât, xua tiah mê khu mơdró kâ rơhêng vâ châ mâu kơvâ cheăng ki ai tơdjâk troh tŏng gum, hnê mơhn o pêi pro khât.

“Ngin rơhêng vâ châ hnê mơhno nhên tâ drêng mâu pơkâ, tơdroăng pơkâ tro pơhlêh. Khu mơdró kâ kal ‘nâi athế pêi pro mâu tơdroăng ki lâi, kơ koan ki lâi tŏng gum tơdrêng ƀă ai mâu troăng hơlâ tŏng gum klâi ‘na mâu mơéa lơ kơxô̆ liăn ‘no hrê. Drêng ai tơdroăng ki môi tuăn ƀă hnê mơhno nhên, khu mơdró kâ kô loi tơngah tâ tung tơdroăng ki ‘no liăn cheăng, pêi pro klêi túa pơkâ pêi ƀă ăm mâu kế tơmeăm châ tê tung kơchô tê mơdró kong têa ê”.

Ƀă mâu khu mơdró kâ ki pêt mơjiâng, uâ pơliê mơdiê ƀă ‘măn kơdĭng kế tơmeăm pêi lo ing chiâk deăng ki vâ tê ngi kong têa ê, malối cho tê ngi kong têa Sinuâ, pakĭng pơkâ thế SPS ối athế pêi pro kơtăng Pơkâ 280 ‘na tơniăn krúa kế kâ dêi Khu xiâm ngăn tíu tơkăng kong Sinuâ, kô châ xêt khât sap ing hâi lơ 1/6/2026. Tơdroăng pơhlêh kân má môi cho khu mơdró kâ athế chêh inâi tung kơmăi CIFER klêi kơ’nâi châ kơ koan ai hnoăng pơkuâ hbru ăm mơéa tơbleăng, teăng ăm ki hên mâu mơéa chêh pro châ kơ koan pơkuâ ngăn ‘na luât pơkuâ ngăn tŏng gum môi tiah hdrối nah. Tơdroăng kố pâ thế khu mơdró kâ hbrâ rơnáu chêh pro hồ sơ ‘na luât, tối tơbleăng kal ƀă chiu pôu râng dêi mâu tơdroăng cheăng ‘na ki tơdrăng dêi mơéa chêh tơbleăng. Xua tơdroăng pơhlêh ‘na túa rak ngăn kố dế pơkâ mơ’no mâu tơdroăng ki trâm tung ai khât ‘na tơdroăng ki pơtó ƀă tơrŭm pơla rêm pâ. Pôa Huỳnh Phú, teăng mâ môi khu mơdró kâ tê mơdró tơmeăm pêi lo ing chiâk deăng tối mâu tơdroăng ki ối tôu tuăn ‘na kih thuât ƀă mơéa ki pơtroh.

“Nôkố khu mơdró kâ ngin dế chêh pro hô sơ pâ hbru ăm mah kơxô̆ tâ tung kơtung ƀă hiăng nâp tiô pơkâ nôkố. Tiah mê klêi kơ’nâi hâi lơ 1/6/2026, drêng Pơkâ 280 păng ‘nâng châ xêt khât mê khu mơdró kâ chiâng vâ pêi pro tâi tâng mâu hồ sơ xuân châ pơtó? Tâng ai tơdroăng ki trâm tơvâ tơvân tung pơla chêh pro ƀă mâu khu ki rơkê ‘na kơvâ cheăng, khu mơdró kâ ƀă kong pơlê kô tơpui ƀă kơ koan ki lâi ‘lo vâ châ hnê mơhno teăm tơdrêng má môi”.

Mâu tơdroăng ki tôu tuăn kố dêi khu mơdró kâ ăm hlo tơdroăng ki rơhêng vâ ‘na môi túa pơkâ hnê mơhno tối cho râng kŏng hnê tơdroăng cheăng drêng hâi khế peie pro hiăng vâ troh. Troăng hơlâ tiâ mơnhên mâu tơdroăng ki tôu tuăn kố, hlối tối rơdêi ivá mơeăm rơtế prôk dêi kơvâ cheăng pêi chiâk deăng, pôa Ngô Xuân Nam, phŏ pơkuâ Ƀơrô cheăng SPS Việt Nam (Khu xiâm ngăn chiâk deăng ƀă Hyôh kong prâi” ăm ‘nâi, tíu pêi cheăng kố rơtế ƀă rêm pâ ki ai tơdjâk hiăng ƀă dế tối tơbleăng, tŏng gum khu mơdró kâ sap ing pơhlêh um tíu mơjiâng pro troh ivá cheăng pơkuâ ngăn tŏng gum. Laga tiô pôa Nam, ki kal má môi nôkố ôh tá xê ối a tơdroăng ki xơpá dêi mâu hlá mơéa chêh pro mê ối a tơdroăng ki hbrâ rơnáu ƀă ki tơdrăng dêi khu mơdró kâ drêng pêi pro hnoăng ki chêh xêh inâi:

"Khu mơdró kâ kal hriăn plĕng nhên mâu pơkâ ƀă hnê mơhno tơdjâk troh. Á tối rơdêi tiah kố drêng hiăng hlê tro, hlê tŭm mâu pơkâ thế mê tơdroăng ki chêh inâi kô ôh tá xơpá to lâi. Laga, hồ sơ athế châ chêh pro tơdâng tơ’mô, sap ing chêh chơ ôh tá tro, ôh tá ‘ló yâ̆u, tơdroăng tối tơbleăng chêh riân tá troh um tíu mơjiâng pro, tíu mơjiâng pro. Bu kal ôh tá tro môi iâ tung hồ sơ mê xuân hiăng pro peăng khu tơrŭm cheăng mơdrếo. Drêng khu mơdró kâ hiăng ‘nâi nhên mâu túa pơkâ, hbrâ rơnáu nhên ƀă pêi pro tro sap ing apoăng mê á loi khu mơdró kâ Việt Nam kô châ pêi chiâng tơdroăng púi rơhêng vâ mâu tơdroăng pơkâ thế ki nếo”.

Khu xiâm ngăn chiâk deăng ƀă Hyôh kong prâi  mơnhên, mâu kế kâ ki châ uâ pơliê lơ kế tơmeăm pêi lo ing chiâk deăng ai xiâm rêi khât, cheăng ki xúa tơniăn tro mâu pơkâ SPS kô pro kơdroh tro mơdât, mơdrếo vêh lơ pơtê pơtân tơdroăng ki tê ngi kong têa ê. Kố xuân cho tơdroăng ki kal vâ rak ‘na ki loi tơngah ăm mâu kế tơmeăm pêi lo ing chiâk deăng Việt Nam tung pơla tơxup tơbriât lâp plâi tơnêi rế hía rế ó.

A rôh hôp “Po ngăn tối tơbleăng mâu tơdroăng kal mâu pơkâ ‘na tơniăn krúa kế kâ ƀă séa ngăn pơreăng ai tung mâu kế kâ SPS tung Tơkêa RCEP ƀă Pơkâ kơxô̆ 280 dêi Sinuâ” xua Khu xiâm ngăn chiâk deăng ƀă Hyôh kong prâi tơkŭm po a Dak Lak, pôa Võ Văn Hưng, phŏ ngế xiâm ngăn chiâk deăng ƀă Hyôh kong prâi, tối nhên, tơdroăng ki lêi tah ki xơpá ăm khu mơdró kâ athế châ tơbleăng pêi kơtăng hdrối hâi lơ 1/6/2026 vâ rak tơniăn pôi tá tro pơtê cheăng ki tê tơmeăm pêi lo

“Ngin đi đo tơhrâ rơtế prôk ƀă kăn pơkuâ kong pơlê, mâu tíu pêi cheăng, kơvâ pêi cheăng ƀă mâu khu mơdró kâ vâ hbrâ rơnáu tro má môi. Ki xiâm cho vâ mơdêk tơƀrê ‘na tê tơmeăm ngi kong têa ê, mơdêk tê mâu kế tơmeăm pêi lo ing chiâk deăng ăm kuăn pơlê, ing mê gum kuăn pơlê pêi chiâk Việt Nam a kong têa Sinuâ xuân môi tiah a mâu kong têa ki ê pơtối mơnhông tơƀrê, pêi châ tơdroăng púi rơhêng vâ nếo tung la ngiâ”.

Tung pơla tê tơmeăm ngi kong têa ê pơtối cho tơdroăng ki kal ăm tơdroăng thăm mơnhông liăn ngân, cheăng rak chp “loi” tung ki dâi lĕm dêi mâu kế tơmeăm, pêi pro kơtăng mâu pơkâ SPS ƀă ki hmâ rĕng ƀă mâu pơkâ nếo kô cho tơdroăng ki kal vâ tơmeăm pêi lo ing chiâk deăng Việt Nam mơnhông krá tơniăn, po rơdâ kơchô tê mơdró ƀă veăng gum tơƀrê tâ ăm cheăng kâ tơnêi têa.