Tung 4 khế apoăng hơnăm, kong pơlê Dak Lak hiăng hbru hlá mơ-éa phêp ăm 10 tơdroăng tơkêa bro ki nếo ‘no liăn pêi cheăng tung mâu kơvâ cheăng (ƀă tâi tâng kơxô̆ liăn ‘no vâ chê 4.800 rơtal liăn), tung mê ai 4 tơdroăng tơkêa ối tung kơvâ uâ pơliê kế tơmeăm pêi lo ing chiâk deăng – loăng pơlái – ká xi xŏng. Mâu tơdroăng tơkêa kố tơkŭm rơdêi tung uâ pơliê mâu plâi kâ ƀă mơnăn mơnoâ păn xúa kơmăi kơmok chal nếo.

Dak Lak xuân tơkŭm po hên tơdroăng pơkâ mơdêk ‘no liăn cheăng, mơđah tơbleăng ki ai hlâu, ki pơxúa dêi kong pơlê ‘na tơmeăm pêi lo ing chiâk deăng, môi tiah pêt – uâ pơliê kơphế, sầu riêng, mắc ca. Tiô Khu ngăn Chiâk deăng ƀă Hyôh kong prâi kong pơlê Dak Lak, mâu tơdroăng tơkêa châ kong pơlê kơjo gum drêng tơhrâ rak tơniăn tro tơdroăng ki xúa tơƀrê kong kế, kơdĭng on tơhrik, hmâ ƀă hyôh kong prâi tơnêi tơníu ƀă hlối mơdêk cheăng tâ, mơdêk ki kơnía dêi mâu kế tơmeăm pêi lo ing chiâk deăng kong pơlê.

Tơdrêng amê hlối pêi pro klêi tơdroăng ki kơnía mâu tơmeăm pêi lo ing chiâk deăng cho môi tung mâu troăng prôk vâ Dak Lak ai ivá pêi châ tơƀrê pơkâ pêi tâk tung la ngiâ.