Riân troh apoăng khế 6/2026, tơdroăng tơkêa bro Hngêi trung hriâm ai tíu kâ koi ối pơtê péa râ Râ má ƀă Râ má péa a 7 to cheăm tơkăng kong peăng mâ hâi Lâ kong pơlê Gia Lai hiăng pro châ dâng 50% tơdroăng cheăng pro. Laga, tá 7 to hngêi trung nôkố xuân ối hrá pro sap ing 15 troh 52 hâi tâng vâ pơchông ƀă túa pơcháu.

Khu pơkuâ ngăn tơdroăng tơkêa pro hngêi trung kong pơlê Gia Lai pơkâ thế, sap ing nôkố troh tâi lơ 30/8, mâu tíu pêi cheăng veăng pêi, tơkŭm mâu ngế cheăng pro, séa ngăn rêm tơdroăng tơkêa, xo tơ’nôm mâu ngế cheăng, kơmăi kơmok rơxế ƀă tơkŭm pro pơtối hlối vâ khŏm pro klêi. Mâu tíu pêi cheăng tiâ mơnhên, séa ngăn athế đi đo séa ngăn tíu pro, hbrâ mơdât kơtăng ki rơkê, tơniăn tung cheăng pro, pôi tá pro pá ah gá kô tơdjâk troh ki krá kâk dêi hngêi trung. Pôa Phạm Xuân Điệp, Ngế pơkuâ mâu tơdroăng tơkêa pro hngêi trung kong pơlê Gia Lai ăm ‘nâi:

“Ai 2 tơdroăng ki kal má môi cho tŏng gum mâu tơdroăng xơpá tơvâ tơvân dêi khu ki xo pro a tíu mơjiâng pro hngêi trung, vâ khu ki xo pro tơbleăng pro tơ’lêi hlâu. Má péa mê khu kô tơrŭm ƀă kong pơlê, tíu pêi cheăng ƀă mâu khu ki xo pro vâ pơtroh khu ki veăng tŏng gum vâ ai tơ’nôm mâu ngế cheăng ăm khu ki xo pro hngêi trung”.

A leh tơbleăng pro, ngế khu ki ‘no liăn pro, tíu pêi cheăng tiâ mơnhên séa ngăn ƀă mâu khu ki xo pro hngêi trung hiăng kĭ rak vế tơniăn klêi tơdroăng pro, krá kâk ƀă tơniăn tung pơla pro, khŏm mơ-eăm pro klêi tro tiô pơkâ dêi Khu xiâm cheăng kal kí, Chin phuh ƀă Vi ƀan hnê ngăn kong pơlê Gia Lai. Pôa Trần Bảo, Phŏ pơkuâ Kŏng ti pêi cheăng tiô rơnó ‘No liăn pro tơmeăm khoăng Dacinco, tíu pêi cheăng pro Hngêi trung hriâm ai tíu kâ koi ối pơtê péa râ Râ má môi ƀă râ má péa Ia Dom tối troăng hơlâ dêi tíu pêi cheăng:

“Kong prâi nôkố, hâi ki lâi xuân mê sap ing 2 troh 3 xôh. Ngin pơkâ pêi tơdrêng hlối tơkéa vâ tối cho ai 5 troh 6 troăng hơlâ pêi pro. Má môi cho thăm tăng pơtroh tơ’nôm mâu ngế cheăng, nôkố rêm to hngêi trung, ngin ai 320 ngế kŏng nhân pro. Má péa, athế rak tơniăn tro rôh pêi cheăng, thăm tơ’nôm mâu ngế pêi cheăng pơtối, 2 troh 3 rôh tung môi măng. Kong mê, ngin kô ai troăng hơlâ pêi tơ’nôm tơvêh. Hlối thăm pơtroh kih sư séa ngăn vâ rak tơniăn tro tung tơdroăng pro tơdroăng tơkêa”.

Tơdroăng tơkêa bro Hngêi trung Phôh thong hdrông kuăn ngo ai tíu kâ koi ối pơtê péa râ Râ má môi ƀă râ má péa a kong pơlê Gia Lai ai tâi tâng kơxô̆ liăn ‘no pêi cheăng lối 1.516 rơtal liăn, châ tơbleăng pro a 7 to cheăm tơkăng kong mê cho mâu cheăm Ia Mơr, Ia Púch, Ia Pnôn, Ia Nan, Ia Dom, Ia Chía ƀă Ia O. Drêng hiăng pro klêi ah, hngêi trung kô kố kô ai lối 7.000 ngế hok tro ƀă mâu hngêi trung hriâm, lâm hriâm, tíu ăm hok tro ối, hngêi kâ hmê, kơpong ăm thái cô ối ƀă tíu ki ê châ pro tŭm. Tơdroăng tơkêa kố ai pơxúa kal khât tung mơnhông ki rơkê ăm mâu tơdroăng ki hnê hriâm a tíu tơkăng kong dêi kong pơlê Gia Lai.