Tơbleăng hnê mơhno a hneăng Hôp, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, mot tung chal nếo mơnhông tơbrê dêi tơnêi têa, tơpui kâ dêi Việt Nam mơhno ki pơ’lêh nếo tuăn tơmiât, mơhno nhên xua mâu tơdroăng ki kân ai pơxúa tiô tuăn tơmiât. Tơpui kâ tối cho tơdroăng cheăng “ki kal, đi đo”, rak hnoăng ki djâ troăng ahdrối tung kring vế Tơnêi têa ing apoăng, ing hơngế ƀă pro ăm tơdroăng rêh ối lâp plâi tơnêi tơ’lêi hlâu mơnhông tơnêi têa.

Tơpui kâ thế tơxâng ƀă ki rơdêi châ pơ-eăng ƀă túa lĕm tro dêi hdroâng mơngế, veăng mơhno um méa môi Việt Nam tơniăn krê, pơkuâ dêi, hơniâp lĕm, tơrŭm ƀă ‘nâi hnoăng pêi pro dêi tơná. Xiâm tơpui kâ cho pơkuâ dêi cho troăng pêi pro ƀă mơ-eăm mơnhông dêi hdroâng mơngế, tơniăn má môi ki pơxúa ăm tơnêi têa - hdroâng mơngế, xo kuăn pơlê pro xiâm dêi tŭm tơdroăng luât pơkâ tŏng gum, tơpui kâ cho tơdroăng cheăng pêi dêi tâi tâng Đảng, tâi tâng kuăn pơlê, pơtối rak vế ki rơdêi dế tâi tâng khu cheăng kal kí ƀă dêi tơnêi têa.