Troăng pêi ‘’Achê kuăn pơlê, ti tiô kuăn pơlê ƀă râng kŏng hnê cheăng pêi”, kong pơlê Lâm Đồng hiăng mơjiâng 2.755 Tôh kŏng ngê̆ kơxô̆ pơlê pơla a mâu thôn, pơlê ƀă vâ chê 16.800 ngế tơdrêng tŏng gum kuăn pơlê  châ hriâm kŏng ngê̆. Tơdroăng hnê xúa kŏng ngê̆ châ pêi pro tơdâng tơ’mô; 100% kăn ƀô̆, kŏng chưk, viên chưk châ hnê pơtâp.

Pakĭng mâu lâm hnê mơjiâng tơdrêng, hên tơdroăng hnê mơhno xúa kŏng ngê̆ xuân châ tơkŭm po, mơhnhôk kơdrâm kuăn pơlê veăng. Tiô Khu pơkuâ Khoa hok ƀă Kŏng ngê̆ kong pơlê Lâm Đồng, mâu cheăm bêng tung kong pơlê xuân hiăng thăm mơjiâng, pêi pro hên troăng pêi, tơmiât pêi rơkê châ tơƀrê ‘na pơhlêh xúa kŏng ngê̆ kơxô̆.