Hiăng hên hơnăm achê ƀă kơpong ki pêt hên loăng plâi măng cầu a Tây Ninh, ngoh Lê Minh Trung, Kăn ngăn ‘na Khu pêi cheăng tơrŭm pêi chiâk deăng a Minh Trung tối ăm ngin ‘nâi, tơdroăng ki ‘nhiê tah lôi tơdroăng kĭ tơkêa tung tơrŭm pêi chiâk pêi deăng meluâ, hiăng chía chu kơdroh la xuân u ối. Drêng yă tê mơdró a mâu hngêi kơchơ tâk kơnâ ó, hên kuăn pơlê tê dêi kế tơmeăm ăm khu mơdró kâ; la drêng yă chu rơpâ vâi pơrá tê dêi kế tơmeăm mê ăm Khu ngăn ‘na pêi cheăng tơrŭm. Ing tơdroăng kố thăm mơdêk ki trâm xahpá ‘na khu ki ngăn ‘na pêi cheăng tơrŭm Minh Trung athế pơhlêh túa lăm rôe kế tơmeăm tiô yă kơchơ, xua hiăng pơkâ há kơlo yă ing apoăng rơnó. Khu ngăn ‘na pêi cheăng tơrŭm hiăng rôe tâi tâng kế tơmeăm, tung pơla mê, kơxô̆ liăn ki pêi tơdroăng cheăng athế châ riân tiô kơlo ki tê mơdró kâ mê.

Xuân trối ti mê, ngoh Nguyễn Viết Vị, Kăn ngăn Khu pêi cheăng tơrŭm ‘na chiâk deăng Phước Thiện ai tối, vâ mơjiâng chiâng kơpong ki pêi pêt kế tơmeăm krá tơniăn a kơpong tíu tơkăng kong Bình Phước ahdrối nah, Khu ngăn ‘na pêi cheăng tơrŭm hiăng mơ’no liăn ki kân ing hdrê loăng, kih thuât rak ngăn troh a tơdroăng mơjiâng inâi ƀă tăng troăng ki vâ tê mơ’no dêi kế tơmeăm. Tung hnoăng cheăng ki tơbriât tê mơdró kơtăng khât, tơdroăng ki rak vế tơrŭm krá tơniăn tung tê mơdró, ƀă pơtối rak vế dêi hnoăng cheăng ki loi tơngah ăm kuăn pơlê dêi cheăm, mê cho tơdroăng pêi pro ki pá puât păng ‘nâng.

Méluâ ti mê, Khu ngăn ‘na pêi cheăng tơrŭm đi đo athế trâm mâ ƀă tơdroăng ki khu mơdró kâ pá kong mot tung tơdroăng “ ‘nhiê tah lôi yă”, thăm mơdêk tơdroăng tí tăng rôe kế tơmeăm dêi tơdroăng ki vâ hlê plĕng vâ rĕng châ rôe mâu kế tơmeăm, pro hên kuăn pơlê hbrâ rơnáu lêi tah lôi mâu tơdroăng, ki hiăng tơhrâ tơkêa, thăm nếo hiăng kĭ tung hlá mơ-éa. Parŏng mê nếo, drêng tơdroăng tơrŭm tê mơdró kâ hiăng chu kơdroh, mê ki pá puih má môi thăm tơpôu rế hơngăm ăm Khu ngăn ‘na pêi cheăng tơrŭm tiô mâu tơdroăng ki hiăng kĭ tơkêa tiô tơdroăng ki hiăng tơhrâ hdrối mê.

Khu ngăn ‘na pêi cheăng tơrŭm ngăn hnoăng ki rôe tơmeăm, rế mơ’no hên liăn ngân tơrŭm cheăng, la drêng ai tơdroăng ki ‘nhiê tah lôi kĭ tơkêa, tơkéa vâ tối, ôh tá ai luât ki lâi ki ó rơdêi vâ kring vế, rak ngăn hnoăng cheăng mê. Ngoh Nguyễn Viết Vị tối ăm ngin ‘nâi:

“Ai mâu tíu ki ối kreăng, tơvâ tơvân cho kal păng ‘nâng ƀă xuân chiâng pro tơ’nhiê mâu tơdroăng tơrŭm cheăng kâ dế nôkố. Mê cho mâu Khu ngăn ‘na cheăng tơrŭm, khu mơdró kâ xuân tá hâi teăm ai troăng hơlâ ki kâi vâ tơveăng gum ki rơdêi ing khu kăn hnê ngăn ƀă mâu râ cheăng tung veăng tơrŭm cheăng ƀă kuăn pơlê. Tung pơla mê, tơdroăng ki khu mơdró kâ krê pá kong pro tơ’nhiê yă, tơbriât tê mơdró kâ ôh tá tơdrăng, ƀă hên mâu kuăn pơlê pro tơ’nhiê lôi ki tơkêa xuân u ối hên ‘nâng”.

Tung hneăng ki tơkŭm mâu kế tơmeăm pêi lo ing chiâk deăng dêi Việt Nam troh a mâu kong têa tung lâp plâi tơnêi, jâ Ngô Tường Vi, CEO Kŏng ti ngăn na tê mơ’no rôe ‘mot kế tơmeăm Chính Thu, tối ăm ngin ‘nâi: hên hơnăm hdrối mê hía nah, khu mơdró kâ dêi jâ hiăng hbrâ rơnáu tung pêi mâu tơdroăng cheăng ƀă khu kơchơ ƀă khu ki tơrŭm cheăng, ki rơhêng vâ tối cho a kơchơ Sinuâ, ing mê, cho vâ tăng troăng châ mơ’no tê tơniăn. Kơnôm ing hên xoh ki séa mơnhên ngăn ƀă tơpui tơno kâ, khu mơdró kâ ai mơnhên tối: plâi krui bŏng kơtôu ngiât, sầu riêng rơtế ƀă hên mâu plâi ki ê dêi Việt Nam kô châ tê hên má môi a kơchơ dêi Sinuâ, chơ to mâu plâi ki mê tro tiô tơdroăng pơkâ ki dâi lĕm khât.

Méluâ ti mê, tơdroăng ki mơ’no tê mâu tơmeăm ki ai inâi păng ‘nâng mê pơkal athế tơdrêng ƀă tro tiô tơdroăng ki kơtăng khât ing khu mơdró kâ ƀă mâu kuăn pơlê. Ing khu ki mơnhên ngăn pơkeăng ki xôh kơdê oâ hdrong, rak ngăn loăng plâi, rak vế tro tiô mah kơxô̆ kơpong ki pêt troh a mâu tơdroăng tơkêa ki pơcháu kế tơmeăm pơrá athế pêi pro kơtăng tro tiô luât. Bú pêi pro tơdroăng xôi ki iâ, ki kŭn xo, tâi tâng troăng tơrŭm cheăng kâ, tê mơdró kô tơdjâk, chiâng tơvâ kreăng pơtâi pơtâng.

Khu mơdró kâ ôh ta kâi môi ngế xêh vâ mơ’no tê kế tơmeăm troh a hên mâu kong têa tung lâp plâi tơnêi, kuăn pơlê xuân ôh tá khoh tơrŭm cheăng kâ ki iâ êt, ki ‘nâng ‘nâi vâ pơhlêh tơdroăng tơrŭm pêi cheăng kâ, tê mơdró krá tơniăn ton. Ki kơjo má môi mê cho mơjiâng kơpong ki pêt mơjiâng kế tơmeăm mê athế dâi lĕm păng nâng tro tiô troăng hơlâ ki tê mơdró kâ a kơchơ. Drêng hiăng châ rak vế tơniăn, ki kơnía dêi mâu plâi kâ Việt Nam mê cho ki păng ‘nâng athế tro tiô troăng hơlâ ki krá kâk. Jâ Ngô Tường Vi tối mơnhên, tâng ôh tá pơhlêh tuăn tơmiât tung pêi chiâk pêi deăng ƀă ôh tá rak vế krá kâk tung rơrŭm cheăng kâ, tê mơdró, mê kuăn pơlê kô rĕng tro mơ’no tah lôi ing khu ki tơrŭm cheăng tê mơdró kế tơmeăm troh a kong têa vâi ê:

“Pakĭng yă tê kế tơmeăm, mê vâi krâ-nhŏng o ối kal tơmiât troh tơdroăng ki tơniăn tung tơdroăng ki rôe xo tâi tâng mâu kế tơmeăm ki mâu khu râ dế pơkâ pêi pro ăm vâi krâ-nhŏng o, ngăn kố cho tơdroăng cheăng ki vâi krâ-nhŏng o athế tơmiât troh ki apoăng. Pin kô chiâng vâ tê ƀă yă ki kơnâ, cho to lâi tâ̆n plâi tung môi hơnăm, la vâi krâ-nhŏng o athế tí tăng mô khu mơdró kâ rơtế ƀă dêi tơná ing pơxiâm pêt mơjiâng mâu hdrê plâi ta troh hên mâu hơnăm kơ’nâi mê hía nah ƀă hên mâu tơdroăng ki ê. Xua ing mâu tơdroăng ki trối mê, pin athế rơtế tơmiât trối lâi vâ pin prôk châ hơngế luâ tâ kơ mê”.

Tiô pôa Nguyễn Đình Tùng, Kăn hnê ngăn ‘na Vina T&T Group, Phŏ Kăn hnê ngăn Khu tơrŭm tê mơdró plâi kơchâi Việt Nam tối, ki châ hên koing têa vâi ê loi tơngah a mâu tơmeăm pêi lo ing chiâk deăng dêi Việt Nam dế châ thăm mơdêk krá tơniăn tung mâu kong têa lâp plâi tơnêi. Tơdroăng ki ai hên kong têa ôh tá rơhêng vâ rôe la nôkố vâi hiăng vâ rôe hên cho roh ki tơ’lêi hlâu vâ ‘mâi rơnêu, mơnhông tơdroăng pêi lo liăn ngân ăm kuăn pơlê. Kơnôm trối mê, kuăn pơlê ki pêi chiâk deăng dế chôa ‘lâng lêi tah lôi túa ki hmâ pêt ki klâi tê tơmeăm ki mê, mê athế pơhlêh túa pêi cheăng, athế hriâm ki rơkê plĕng nếo ‘na kih thuât ƀă athế rơkê tung tơdroăng ki mơnhên xiâm rêi dêi mâu hdrê loăng plâi ki mê vâ veăng châ tơrŭm tung tơdroăng tê mơ’no dêi mâu kế tơmeăm ki mê.

Ing tơdroăng ki pêi pro păng ‘nâng, pôa Tùng hiăng vêh mơnhên ngăn ki xiâm kal má môi xuân cho hiâm mơno loi tơngah dêi khu mơdró kâ ƀă kuăn pơlê pêi chiâk pêi deăng. Khu mơdró kâ tơveăng gum hnê tối ‘na kih thuât ƀă tơkêa kô rôe tơmeăm dêi kuăn pơlê; pơhlêh amê, khu ki pơkuâ ngăn kơdrum deăng athế rak vế, pêi pro tro túa ki mơdâ pêt, rak ngăn tơmeăm ƀă pơcháu tơmeăm tro tiô tơdroăng kĭ tơkêa. Ki păng ‘nâng, ai hên hĕng khu tơrŭm cheăng hiăng tro ‘nhiê tah lôi xua ing hiâm mơno ki lối rơhăm kơ châ tê dêi tơmeăm ƀă yă liăn to kơnâ a rơnó ki kố a rơnó ki ê. Laga, tung tơrŭm cheăng lâp plâi tơnêi tung mơdró kâ tiah nôkố, túa ki cheăng kâ iâ êt, ukố umê, ôh tá tơrŭm krá kâk, ôh tá pá ai xếo ‘na tơdroăng mê.

Tuá cheăng ki pôa Nguyễn Đình Tùng hiăng châ ‘nâi vâ pơtối rak vế, pêi pro ing tơdroăng ki ai păng ‘nâng cho kal khât, mê cho tơkŭm pêi chiâk pêi deăng kơnôm ing mâu Khu ngăn ‘na pêi cheăng tơrŭm vâ kuăn pơlê châ pơkuâ ngăn ƀă séa mơnhên ngăn hnoăng pêi cheăng dêi rơpó:

“Dế nôkố, ngin bu pêi cheăng ƀă Khu ngăn ‘na pêi cheăng tơrŭm. Drêng mê, vâi krâ-nhŏng o ki veăng pêi mê kô rak vế tro tiô mâu tơdroăng pơkâ, mơnhên ngăn tơdroăng cheăng dêi pó. Ƀă mâu ngế ki pro xôi mê vâi ki mê kô tro tah lôi, ôh tá eâ athế khu ngăn ‘na mơdró kâ mơ’no, lơ mơdât vâi ki kố ki mê. Ngin bu kal rak vế tơniăn ăm tơdroăng cheăng vâi ki mê ƀă mâu ngế ki dế pêi cheăng păng ‘nâng, pêi tro ƀă ai troăng hơlâ ki xiâm krá tơniăn vâ mơjiâng inâi Việt Nam dế nôkố”.

Drêng mâu hngêi kơchơ kong têa ê pơkâ pơkal athế tê mâu kế tơmeăm ki dâi lĕm khât, mê hnoăng tơrŭm cheăng chiâk deăng ôh tá xê to tơdroăng ki kal athế rah xo, pêi pro, mê ga hiăng chiâng hnoăng cheăng ki a xiâm păng ‘nâng. Vâ mâu kế tơmeăm pêi lo ing chiâk deăng dêi Việt Nam châ mơnhông hơngế, tơdroăng ki tơrŭm rak vế hnoăng tơkêa ƀă tơbêng tuăn loi krá tơniăn ton pơla khu mơdró kâ ƀă kuăn pơlê pêi chiâk deăng cho troăng hơlâ ki kal má môi athế pơtối rak vế, pêi pro.