Tiô pơkâ pêi, tơdroăng tơkêa bro pêt dâng 200ha, tâi tâng kơxô̆ liăn mơ’no 139 rơtal liăn ƀă kô pêi pro tiô rêm hneăng tơtro ƀă ivá mơ’no liăn cheăng xuân môi tiah tơdroăng nốkô. Tiô khu mơ’no liăn cheăng, tơdroăng tơkêa bro tơmiât troh mơjiâng troăng pêt ƀă uâ bro pơkeăng dâi lĕm, xúa kŏng ngê̆ tiô rơxông nếo vâ mơjiâng mâu tơmeăm tơxâng pơkâ dâi lĕm tiô pơkâ ƀă tơdroăng kal vâ kơchơ mơdró. Pôa Lê Minh Thông, Kăn hnê ngăn Vi ƀan cheăm Vĩnh Thanh tối ăm ‘nâi, Đan Sâm cho loăng pơkeăng ki kơnâ liăn, châ xúa rơdâ tung khăm pơlât ƀă pơkeăng rêi nhâ hlá loăng ƀă chiâng vâ mơnhông mơdêk kân.

“Tơdroăng tơkêa bro kố troh ƀă cheăm po roh tơ’lêi nếo tung pơhlêh hdrê pêt ing pêi chiâk deăng tê kơtê mê chiâng pêi chiâk deăng xúa kŏng ngê̆ uâ mơdiê ƀă mâu tơdroăng pêt mơjiâng pơla khu tê mơdró ƀă kuăn pơlê. Ing kố xuân cho troăng tăng cheăng pêi cheăng a cheăm”.

Pôa Lê Quang Hùng, Kăn pơkuâ Khu pơkuâ ngăn pơkeăng ƀă khăm pơlât Gia Lai tối ăm ‘nâi, tơdroăng pơkâ kơxô̆ 72 dêi Khu xiâm kal kí ƀă Pơkâ pêi kơxô̆ 06 dêi Tỉnh ủi Gia Lai ‘na mơnhông kơvâ khăm pơlât hneăng hơnăm 2026 – 2030 hiăng mơnhên mơnhông pêt pơkeăng cho môi tung mâu hnoăng cheăng ki kơjo.

Xua mê, tơdroăng pêi pro tơdroăng tơkêa bro pêt loăng pơkeăng a Vĩnh Thạnh tơtro ƀă troăng hơlâ mơnhông dêi Gia Lai ƀă mơnhên troăng prôk la ngiâ tơdjuôm dêi lâp tơnêi têa.

“Loăng Đan Sâm cho môi pơkeăng ki kơnâ ƀă djâ hên ki pơxúa ăm ivá. Nôkố tung lâp plâi tơnêi, hên kong têa hiăng xúa vâ pơlât mâu tơdroăng châi ‘na plâi nuih, ngăn mơhum kuăn ngá ƀă rak ngăn ivá vâi kơdrâi. Kố xuân cho tơdroăng tơkêa bro apoăng a Việt Nam pêt loăng Đan Sâm ƀă ƀăng kân. Cho kuăn pơlê Vĩnh Thạnh xuân kô châ pơxúa ing kơpong”.

Tơdroăng pêi pro tơdroăng pêt ƀă uâ bro nhâ loăng pơkeăng Đan Sâm a cheăm Vĩnh Thạnh, kong pơlê Gia Lai kô gum pêi pro châ tơƀrê tơmeăm mơnhông pêt loăng pơkeăng dêi cheăm. Ing mê, mơjiâng tơdroăng mơnhông cheăng kâ, tăng cheăng pêi, chôa ‘lâng mơjiâng tơdroăng ki kơnâ loăng pơkeăng krá tơniăn ƀă pơkâ mơnhông kơvâ khăm pơlât ƀă pêi chiâk deăng kŏng ngê̆ rơxông nếo dêi kong pơlê Gia Lai.