Kố châ ngăn cho troăng hơlâ mơnhông tơƀrê vâ mơdêk mơdêi pơhlêh chêh pro hlá mơ-éa, mơdêk ivá pêi cheăng tơxup tơbriât ƀă tơ’mot ‘no liăn pêi cheăng mâu tơdroăng tơkêa ki kal vâ gum ăm tơdroăng pơkâ pêi thăm mơnhông cheăng kâ tâk péa kơxô̆ dêi kong pơlê. Tiô troăng hơlâ kố, tung pơla chêh pro hlá mơ-éa môi tuăn lơ ‘mâi pơhlêh mâu mơ-éa mơnhên chêh inâi ‘no liăn pêi cheăng kô châ kơdroh iâ hâi khế pro châ 50% tâng vâ pơchông ƀă túa pơkâ pêi nôkố.

Troăng hơlâ kố châ xúa ƀă mâu tơdroăng tơkêa pro troăng klông kơpong cheăng ƀă kơmăi kơmok, tíu pêi cheăng ƀă kơmăi kơmok, tíu pêi cheăng logistics, kơno tuk; mâu tơdroăng tơkêa pro hngêi ối, on tơhrik ƀă mâu tơdroăng tơkêa bro ai tâi tâng kơxô̆ liăn pro sap ing 800 rơtal liăn tơngi klêng. Mâu hồ sơ ối tung tơdroăng ki châ kơjo kô châ krâ hdró ki vâ kơnó vâ klâ xoăng, séa ngăn ƀă tơleăng tung tâi tâng túa pơkâ tơleăng.

Ki rơhêng vâ tối, mâu khu râ, kơvâ cheăng ƀă kong pơlê châ pơkâ thế kơjo gum xing xoăng mâu ngế cheăng, hâi khế vâ chêh pro hồ sơ. Tâng hrá athế tối tơbleăng lơ ôh tá tiâ mơnhên tro hâi khế kô athế pôu râng dêi tơdroăng cheăng ƀă ngế ki ai hnoăng pơkuâ ngăn dêi tíu pêi cheăng dêi tơná.