Pakĭng tơdroăng ki rak tơniăn gâk kring, tơniăn ăm hneăng tơ’noăng, kong pơlê tơmâng ngăn khât troh tơdroăng tŏng gum hok tro kơpong hngế hngo, kơpong kuăn pơlê hdrông kuăn ngo ƀă mâu vâi o ai tơdroăng rêh kâ ối xơpá, rak tơniăn ăm hok ki xơpá ai rơxế kơto chơ, tíu kâ ối ki ôh tá tơdjâk troh tơdroăng tơ’noăng. Hneăng tơ’noăng hơnăm kố, Dak Lak tơkŭm po 64 to tíu tơ’noăng ki păng ‘nâng, 55 tíu hbrâ ƀă dâng 1.500 to lâm tơ’noăng. Lối 5.000 ngế kăn ƀô̆, thái cô, mâu ngế cheăng châ pơtroh veăng tung mâu rôh tơkŭm po tơ’noăng.

Kong pơlê hiăng xoăng nhên tơdroăng cheăng ăm rêm khu râ, kơvâ cheăng, cheăm bêng; hlối séa ngăn tŭm mâu kơƀăng tăng, mâu ngế cheăng ƀă mâu túa pơkâ tŏng gum tâng ai. Ƀă mâu cheăm bêng kơpong hngế hngo ƀă kơpong xơpá, mâu cheăm bêng tơrŭm ƀă hngêi trung séa ngăn, ai túa pơkâ tŏng gum tơtro ăm hok tro. Tơdroăng “Tŏng gum hok tro a rơnó tơ’noăng” châ tơbleăng lâp lu ƀă tơdroăng veăng tơbleăng dêi đoân viên, droh rơtăm ƀă mâu khu tơrŭm đoân theh, gum hok tro ‘na tíu kâ koi, rơxế to prôk lăm ƀă mâu tơdroăng kal kí ê tung pơla rôh po tơ’noăng.

Rơtế amê, mâu khu ki ai tơdjâk troh rak tơniăn a troăng prôk, mơ’no on tơhrik, tối tơbleăng ƀă mâu tơdroăng cheăng tŏng gum tung rôh tơ’noăng tung mâu tơdroăng.