Laga, tơdroăng tăng ƀăng tơnêi, xĕn kuăn pơlê rêh ối ƀă tơkŭm pêi pro tơdroăng tơkêa bro xuân cho mâu tíu ki kreăng kân tơdjâk troh tơdroăng ki mơ’no liăn cheăng ƀă tơtêk cheăng kâ. Vâ kêi đeăng mâu pơkâ GRDP 6 khế apoăng hơnăm tâk ki vâ iâ 9,1%. Pôa Nguyễn Việt Hùng, Kăn hnê ngăn Vi ƀan kong pơlê Khánh Hòa pơkâ mâu khu, kơvâ cheăng ƀă kong pơlê tơkŭm tah lôi pá puât ăm khu tê mơdró, po rơdâ tíu tê mơdró, mơdêk pêt mơjiâng tơmeăm kơmăi kơmok, mơnhông tâi tâng ivá mâu hngêi kơmăi on tơhrik  ƀă mơdêk tơdroăng mơjiâng pro mâu tơdroăng tơkêa bro.

Kong pơlê xuân pơkâ tơkŭm mơngế pêi cheăng ăm tơdroăng tăng ƀăng tơnêi, xĕn kuăn pơlê ối, mơ’no liăn cheăng ƀă mơ’no liăn cheăng tơnêi têa, ki má lối cho mâu tơdroăng tơkêa bro troăng klông, tơdroăng tơkêa bro ki tơtêk ƀă mâu kơpong xĕn ối.