Péa kăn pơkuâ mơnhên Việt Nam ƀă Timor Leste ai hên tơmeăm ki vâ po rơdâ tơrŭm xua pơxúa dêi kuăn pơlê péa tơnêi têa ƀă veăng gum hơniâp lĕm, mơnhông mơdêk krá tơniăn dêi kơpong. Péa pâ môi tuăn pơtối pro krá tơniăn loi tơngah kal kí, thăm tơpui tơno khu râ kăn xiâm, pêi pro châ tơƀrê mâu tơdroăng môi tuăn hiăng kĭ tơkêa. ‘Na cheăng kâ, péa tơnêi têa kô mơdêk rĕng kĭ ƀă pêi pro Tơdroăng pơkâ Tê mơdró pơla péa pâ, tơdrêng amê po rơdâ tơrŭm cheăng tung mâu kơvâ phái, tơmeăm pêi lo ing chiâk deăng, ká xi xŏng, teăn ếo pơtâk, hyôh phôn, pơhlêh xúa kŏng ngê̆ kơxô̆, hngêi trăng troăng klông ƀă mơdró.

Ngế pro xiâm hnê ngăn kong têa Timor – Leste pơkâ thế Việt Nam pơtối pơtroh mâu tơmeăm ki rơdêi, ki rơhêng vâ tối cho phái, gum tơniăn bê kế kâ ăm kong têa kố. Péa pâ xuân môi tuăn thăm tơrŭm gâk kring tơnêi têa, kring tơniăn, hnê hriâm, hnê mơjiâng mơngế pêi cheăng, khôi túa lĕm tro, ôm hyô, tơ’noăng ivá ƀă tối túa ki rơkê tơtro mơnhông mơdêk pêi chiâk deăng krá tơniăn.