Kơ’nâi môi hơnăm tơbleăng pêi, kong pơlê Dak Lak hiăng ‘mâi xing xoăng lế lĕm 102 tíu pêi cheăng râ cheăm, djâ Tíu xiâm pêi cheăng bro mâu hlá mơ-éa pêi cheăng hlối, veăng rah pro rế lĕm khu kăn pêi cheăng, mơdêk ki tơbrê tung tơdroăng pro mâu hlá mơ-éa  ăm kuăn pơlê, khu mơdró. La kong pơlê xuân ối trâm xơpá ‘na ki tơrŭm pơla rêm râ, iâ mơngế ki rơkê tro kơvâ cheăng a mâu tơdroăng cheăng pêi ƀă chiâng pá hngăm ngo tung pơla pêi cheăng ƀă mâu kăn ƀô̆ cheăm.

Tơbleăng a rôh pêi cheăng, jâ Bùi Thị Quỳnh Vân, Phŏ Pơkuâ ngăn Khu tơkŭm cheăng Tíu xiâm tơnêi têa tối mâu tơdroăng pâ thế dêi kong pơlê Dak Lak tơdjâk troh khu kăn pêi cheăng, ‘na biên chế, ‘na luât pơkâ tŏng gum ƀă pơ‘lêh kơxô̆ vâ tơkŭm, tơbleăng ăm râ kơpêng, pro  xiâm pê klêi luât pơkâ, luât tŏng gum tung la ngiâ.