Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối Việt Nam đi đo môi tuăn mơ jiâng, mơnhông tơnêi têa Kul; tối nhên tơrŭm cheăng pơla péa Đảng, péa tơnêi têa Việt Nam - Kul ƀă pái Đảng, pái Tơnêi têa Việt Nam – Kul - Lếo cho tơmeăm khoăng kơnía git kal pơtối rak vế.

Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế mơdêk pêi tơƀrê pơxúa luât tơrŭm cheăng nôkố, malối mâu rôh trâm mâ pơla mâu kăn xiâm Chin phuh, kăn lêng, Kong an ƀă ‘na tơpui kâ pái tơnêi têa. Khĕn kơdeăn tơdroăng tơpui tơno pơla pôa Hun Manet, Ngế pro xiâm hnê ngăn kong têa Kul ƀă pôa Lê Minh Hưng Ngế pro xiâm hnê ngăn Chin phuh, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối phiu ro hlo mơnhông tung tŭm tơdroăng tơrŭm cheăng pơla péa pâ, ƀă ki xiâm cho loi nhoăm dêi rơpó tơdroăng kal kí, tơrŭm cheăng lêng - kring tơniăn krá, tê mơdró tâk, trâm mâ tơpui tơno pơla mâu hơnăm ối nếo rế hên tâ.

Péa pâ xuân tối nhên hnoăng pêi pro la ngiâ dêi Đảng, hlối tối mâu tơdroăng vâ pêi tung la ngiâ mơdêk tơrŭm ‘na khoa hok, kŏng ngê̆ ƀă tơdjêp mơnhông tung mâu hơnăm la ngiâ kố ah.