Tiô séa mơnhên ngăn Khu Séa mơnhên kơxô̆ 26, Khu kăn pơkuâ hnê ngăn Đảng ủi kong pơlê Dak Lak hiăng hbrâ tối pơtâng, hnê tơdjâ, pơkâ thế pêi pro tơdrăng lĕm khât mâu troăng tơdjâ, troăng pơkâ dêi Tíu xiâm Đảng. Kong pơlê hiăng teăm rĕng ‘mâi rơnêu khu pơkuâ hnê ngăn cheăng, thăm pêi pro rơdêi tung xing xoăng hnoăng cheăng, hnoăng pơkuâ ngăn, ‘mâi rơnêu tung chêh bro hlá mơ-eá ƀă xúa pêi cheăng pơhlêh ƀă kơxô̆ tiô túa nếo, tơkéa vâ tối pêi cheăng to tung kơmăi, ƀă internet. Ƀă hnoăng cheăng mơnhông pêi cheăng kâ, Dak Lak hiăng mơjiâng chêh tối ahdrối tơdroăng ki vâ pêi cheăng khŏm pêi lo kế tơmeăm, liăn ngân rế hên tiô tơrêm hơnăm, tiô tơrêm kơvâ cheăng, rêm khu cheăng; mơjiâng Khu Hnê mơhno pêi pro hnoăng cheăng xiâm ki pêi lo kế tơmeăm, liăn ngân châ to 2 to kơxô̆, tơdrêng amê, hnối pơkâ, mơ’no pơtroh hên troăng hơlâ vâ thăm mơnhông pêi cheăng kâ, pêi lo liăn ngân, mơnhông tơdroăng rêh ối pơlê pơla. Tung pơkâ pêi pro tiô Pơkâ 57, kong pơlê hiăng pêi pro kơhnâ khât mơnhên păng ‘nâng mâu hnoăng cheăng, troăng hơlâ ‘na cheăng khoa hok kŏng ngê̆, pơhlêh nếo ki hloh hlê rơkê plĕng ƀă xúa kơxô̆, cheăng tung măng internet.

Ƀă hnoăng cheăng xiâm thăm pêi lo kế tơmeăm, liăn ngân châ 2 to kơxô̆. Mê khu séa ngăn hiăng vêh mơnhên pơcháu hnoăng cheăng ki vâ thăm pêi lo liăn ngân, kế tơmeăm ăm 102 to cheăm-bêng ki ta hâi teăm pêi cheăng tro tiô khoa hok chal nếo. Ki tơbrê dêi rak vế, pêi pro mâu hnoăng cheăng tung 3 khế apoăng hơnăm, ivá pêi mơjiâng kế tơmeăm trối tiah nôkố tá hâi teăm tơxâng ƀă tơdroăng hiăng pơcháu. Tung pơla mê, ai mâu kơvâ cheăng ki tơ’lêi kâi châ mơnhông ƀă hlâu vâ pêi lo liăn ngân, trối kơvâ ôm hyô, pêt loăng mơjiâng kong, la 2 kơvâ ki kố tá hâi teăm châ pêi tâi ivá, hnoăng cheăng tơná, xua mê, kơxô̆ liăn ngân ki tơveăng gum vâ mơnhông cheăng kâ dêi kong pơlê ối iâ, ối ‘ro ó ‘nâng.

Tung pơkâ pêi pro tơdroăng Pơkâ 57, ai mâu cheăm, bêng ối trâm hên xahpá tung tơdroăng ki vâ mơnhên hnoăng cheăng tơná. Dế nôkố, ối ai 56 kơtâ hlá mơ-eá ki ai tơdjâk troh tơdroăng ki vâ ‘mâi rơnêu túa cheăng tung kơvâ khoa hok kŏng ngê̆, pơhlêh tiô túa ki hloh hlê rơkê plĕng chal nếo, ƀă xúa kơxô̆ tá hâi teăm châ pêi pro tâi tơdroăng. Mâu tơmeăm khoăng kŏng ngê̆ thŏng tin, mâu phân mêm ƀă mâu hnoăng cheăng ki pơhlêh xúa kơxô̆ chal nếo, ki rơhêng vâ tối, a mâu cheăm ối kơpong hơngế, hơngo xuân ối trâm hên tơdroăng ki xahpá, ing mê, tơdjâk troh ki dâi lĕm, ki tơtro khât drêng pêi pro tiô dêi mâu hnoăng cheăng tơná.

A chôu phut pêi cheăng, kong pơlê Dak Lak hiăng pơkâ thế Tíu xiâm pơkuâ hnê ngăn Đảng séa mơnhên ngăn, lêi tah lôi mâu tơdroăng ki ối kreăng, tơvâ tơvân ai tơdjâk troh tơnêi tíu, malối tơnêi pêi chiâk pêi deăng, tơnêi pêt mơjiâng kong; hriăn plĕng tơdroăng ‘mâi rơnêu mâu cheăm ki cheăng kâ ối iâ vâ kâi mơnhông; pêi pro klêi troăng tơveăng gum ăm mâu khu kăn ƀô̆ cheăm ƀă pơtối mơdêk hnoăng ki tŏng gum mơ’no liăn ngân mơjiâng pro troăng prôk, hngêi pêi cheăng. Tơdrêng amê, kong pơlê xuân pơkâ, mơjiâng mâu troăng hơlâ ki krê xêh vâ khoh kâi châ mơnhông bă thăm mơdêk ivá mơnhông tung la ngiâ. Pôa Lương Nguyễn Minh Triết, Kăn pơkuâ hnê ngăn Đảng ủi kong pơlê Dak Lak pâ thế:

“Pâ thế khu ki ngăn ‘na hnoăng cheăng ai hlá mơ-éa chêh tối, tơbleăng hên vâ kong pơlê pêi pro tiô Tơdroăng 72 dêi Kuô̆k hô̆i ‘na pêi pro ahdrối mâu troăng hơlâ ki ai tơdjâk troh hnoăng cheăng krê ki vâ mơnhông ăm pơlê kong kơdrâm Buôn Ma Thuột, khŏm mơ-eăm mơjiâng Ƀuôn Ma Thuột chiâng tíu xiâm dêi Tây Nguyên vâ tơkŭm mơnhông ăm kơpong kố; Ki má peá nếo cho a peăng mâ hâi Lo, cho tíu ki pêi cheăng kâ kân Pêa hdroh Phú Yên, xuân chiâng vâ tối, ivá cheăng ki vâ khŏm pêi lo liăn ngân to a 2 to kơxô̆ lơ ôh tung la ngiâ, mê kal athế tơkŭm mơnhông cheăng kâ a kơpong ki kố cho ki xiâm. Ngin pơkâ thế kal athế xúa Tơdroăng 127 dêi hơnăm 2012 dêi Chin phuh pêi pro trối kơpong tíu pêi cheăng kâ Bắc Vân Phong vâ ga tơ’lêi hlâu tung tơ’mot khu mơdró kâ, mơ’no liă cheăng ăm kơpong ki kố”.

Mơnhên ngăn ‘na ki dâi khât tung rak vế, pêi pro mâu hnoăng cheăng mơnhông pêi cheăng kâ-rêh ối pơlê pơla dêi Dak Lak, pôa Nguyễn Thanh Nghị ai tối tiah kố, ivá ki mơnhông pêi cheăng kâ dêi kong pơlê tiah dế nôkố ối hơngế ó ‘nâng tâng vâ pơchông ngăn ƀă hnoăng cheăng ki pơcháu khŏm pêi lo liăn ngân tâk châ 2 to kơxô̆. Mâu khu râ, kơvâ cheăng pêi lo kế tơmeăm tá hâi tơxâng ƀă ivá, ƀă kế tơmeăm ai hlâu dêi kong pơlê. Khoa hok kŏng ngê̆, ki pơhlêh nếo tung hloh hlê rơkê plĕng ƀă xúa kơxô̆ ta hâi tơxâng ƀă ivá cheăng  ki kal vâ thăm mơnhông pêi cheăng kâ.

Kăn pơkuâ ngăn ‘na séa mơnhên kơxô̆ 26 hiăng pâ thế kong pơlê pơtối séa mơnhên ngăn tâi tâng mâu kơvâ cheăng ki veăng mơnhông cheăng kâ tung kong pơlê kố, tơkŭm lêi tah lôi mâu tíu ki kreăng ‘na chêh bro hlá mơ-eá, tíu ki vâ mơ’no liăn cheăng tê mơdró kâ; thăm mơdêk châ tơƀrê ‘na ki pơxúa tung pơkuâ hnê ngăn, thăm mơdêk pơhlêh pêi cheăng ‘na kơxô̆, cho cheăng tung măng internet ƀă pêi pro tơdrêng, tơ’mô mâu troăng hơlâ ki krá tơniăn ton la ngiâ, ki rơhêng vâ tối cho mơnhông kơvâ cheăng ki ó rơdêi vâ thăm po troăng hơlâ, ki mơnhông ‘na mơngế cheăng hloh hlê rơkê plĕng ăm tơdroăng pêi lo liăn ngân, kế tơmeăm hên, rĕng ƀă krá tơniăn.

“Pơkâ thế pó vêh séa mơnhên ngăn tâi tâng mâu ivá cheăng ki mơ’no pêi pro tung lâp kong pơlê kố vâ thăm pêi lo kế tơmeăm, liăn ngân; vêh séa mơnhên ngăn túa ki chêh bro hlá mơ-eá, tơnêi tíu ki mơ’no liăn cheăng, tê mơdró kâ dêi kong pơlê, túa ki chêh bro hlá mơ-eá, Khu pơkuâ ngăn chal nếo tung pơhlêh xúa kơxô̆ ga ti lâi, pâ thế pó athế vêh mơnhên ngăn, tơkŭm lêi tah lôi mâu tíu ki kreăng, vâ tơkŭm tah lôi mâu tơdroăng ki ối tơvâ tơvân, ki ối trâm hên xahpá ƀă rak vế, pêi pro tơdrêng, châ tơƀrê mâu troăng hơlâ ki krá tơniăn ton, malối ‘na mơngế pơkuâ, mơngế pêi cheăng”.