Ƀă ƀăng tơnêi lối 24.000 km² ƀă pơ’leăng mâ mơngế vâ chê 4 rơtuh ngế, Lâm Đồng châ pơkâ pêi chiâng tíu ki thăm mơnhông dêi kơpong Kĭng têa kơxĭ peăng Hdroh tơnêi têa ƀă Tây Nguyên. Tiô pơkâ, ƀăng tơnêi mơnhông châ tơkŭm po tiô pái kơpong cheăng ki xiâm mê cho kong ngo, peăng kĭng têa kơxĭ peăng tơdế ƀă a kĭng têa kơxĭ. Tung pơla mê, kơpong Đức Trọng, Đơn Dương, Lâm Hà ƀă Di Linh châ pơkâ  mơjiâng pro kơphô̆ krâ ƀă tơdjêp ƀă Tíu pêi cheăng – kal kí dêi kong pơlê pro a cheăm Đức Trọng. Kơpong Đà Lạt châ pơkâ pro chiâng tíu pêi cheăng mơhno túa lĕm tro, hnê hriâm, khoa hok kong ngê̆ ƀă ôm hyô kong kế, nhâ loăng, têa, tíu ối pơtê tơxâng ƀă kong têa ê.

Tiô pôa Tôn Thiện San, Kăn pơkuâ Khu ngăn liăn ngân kong pơlê Lâm Đồng, kong pơlê kô mơjiâng 6 to tíu pêi cheăng ing peăng Kơnhŏng troh peăng Hdroh ƀă peăng mâ hâi Lo – mâ hâi Lâ, tơdjêp ƀă mâu kơpong cheăng ki xiâm sap ing kong ngo chu troh a têa kơxĭ. Tâi tâng kơxô̆ liăn ‘no pêi cheăng pơla hơnăm 2026 – 2030 tiô tối hdrối cho lối 1 rơtuh rơtal liăn, tung mê, kơxô̆ liăn pa kong liăn ngân tơnêi têa châ dâng 80%.

“ ‘Na túa pơkâ pêi mê kong pơlê hiăng mơnhên troăng tơmiât pêi tơ’mot ‘no liăn cheăng tung mâu kơvâ cheăng ki kal, ki xiâm, ki ai hlâu mâu kế tơmeăm khoăng, ki pơxúa tơxup tơbriât, logistics, mơjiâng pro kơphô̆, ôm hyô dâi lĕm, pêi chiâk deăng xúa kơmăi kơmok rơxông nếo, kơmăi kơmok uâ pơliê mâu tơmeăm, on tơhrik, tê mơdró, hnê hriâm, khăm pơlât, túa lĕm tro, tơ’noăng ivá, pơhlêh kơxô̆, khoa hok kong ngê̆ ƀă pơhlêh nếo tơmiât pêi rơkê”.

Pôa Hồ Văn Mười, Ngế cheăng tung Tíu xiâm Đảng, Kăn hnê ngăn Vi ƀan kong pơlê Lâm Đồng ăm ‘nâi, cheăng ‘mâi pơhlêh túa pơkâ pêi ai pơxúa kal khât klêi kơ’nâi hôp môi tuăn pơla pái to kong pơlê Lâm Đồng, Bình Thuận ƀă Dak Nông, pro tíu luât ƀă pơkâ pêi tơdroăng cheăng tung la ngiâ ăm hneăng mơnhông nếo. Kăn hnê ngăn Vi ƀan kong pơlê Lâm Đồng tối nhên, Lâm Đồng nôkố cho kong pơlê ki ai ƀăng tơnêi kân má môi lâp tơnêi têa, ai hên ki pơxúa ‘na kế tơmeăm khoăng tung kơdâm tơnêi, on tơhrik ‘mâi pro, pêi chiâk deăng xúa kong ngê̆ rơxông nếo ƀă ôm hyô, xua mê, kal ai môi túa pơkâ pêi nếo vâ mơdêk khât ki ai hlâu, ivá pêi cheăng chiâng ton khế hơnăm.

“ ‘Mâi pơhlêh túa pơkâ pêi rôh kố cho mơhno ivá khŏm mơ-eăm dêi kong pơlê tung pơhlêh nếo túa mơjiâng pro, xo kuăn pơlê ƀă khu mơdró kâ cho ngế ki kal, xo khoa hok kong ngê̆, pơhlêh nếo tơmiât pêi rơkê, pơhlêh xúa kong ngê̆ kơxô̆ ƀă thăm mơnhông ngiât pro ivá mơ-eăm dêi kơpong Tây Nguyên ƀă Nam Trung Bộ. Túa pơkâ pêi kố ôh tá xê to mơnhên pơkâ pêi xiâm cho vâ mơnhông mê ối po troăng ngăn ki ton xŏn tung la ngiâ; ôh ti xê to tí tăng xúa tơƀrê mâu tơdroăng ki pơxúa ai hlâu mê ối vâ pro mâi ivá mơnhông mơdêk nếo”.