Tơdroăng kố châ tơbleăng pêi a tâi tâng mâu tíu pêi cheăng Đoân, tơkŭm a mâu tíu tơ’noăng ƀă tơdroăng veăng ai mâ dêi lối rơpâu ngế đoân viên, droh rơtăm. Tung mê, khô̆i Đoân mâu hngêi trung đăi hok, kao đăng mơjiâng pro 12 khu ki lăm pleăng dêi hnoăng ƀă lối 300 ngế cheăng; khô̆i Đoân hngêi trung râ má pái ƀă Đoân mâ cheăm, bêng, kơpong tíu pêi cheăng ai 273 khu tŏng gum.

Hdrối hneăng tơ’noăng, khu kố mơdêk mơdêi tơdroăng khôi hmâ cho tŏng gum “Rôh tơ’noăng hơniâp ro”, mơhnhôk tơlo gum diâp liăn hriâm rơkê ‘Tŏng gum rôh tơ’noăng”, gum rơbot ƀai, tiâ mơnhên ‘na tơdroăng cheăng tung la ngiâ ƀă tiâ mơnhên hiâm mơno ăm hok tro. Tơdroăng kố ối veăng gum pro tơ’lêi hlâu, ăm hok tro hmiân tuăn, loi tơngah mot tung hneăng tơ’noăng ki kal.