Klêi ngăn, Thiê̆u tươ̆ng Lương Đình Chung tơmâng xo, khĕn kơdeăn hiâm mơno tơrŭm, mơ-eăm tơkâ luâ xơpá dêi mâu kăn ƀô̆, mô đô̆i tung tơdroăng mơdêk rĕng pro mâu hngêi trung hriâm kơpong tơkăng kong. Pêi pro troăng hơlâ dêi Khu xiâm kal kí, Khu kăn pơkuâ hnê ngăn Đảng lêng Tơnêi têa ƀă Khu pơkuâ ngăn lêng ‘na mơnhông tơdroăng hnê hriâm kơpong hdrông kuăn ngo, kơpong tơkăng kong, sap ing khế 4/2026 troh nôkố, Kuân khu 5 hiăng pơtroh lối rơpâu ngế kăn ƀô̆, mố đô̆i veăng pro lối chât to hngêi trung hdrông kuăn ngo ai tíu kâ koi ối pơtê péa pâ a Đà Nẵng, Quảng Ngãi, Gia Lai ƀă Dak Lak.

Kăn pơkuâ Đảng lêng Kuân khu 5 pơkâ thế mâu tíu pêi cheăng pơtối tơrŭm, tơkŭm pro rơkê plĕng, vâ rak tơniăn tơdroăng pro, krá dâi lĕm ƀă tơniăn tung pêi cheăng.