Vi ƀan bêng Đông Gia Nghĩa tối ăm ‘nâi bêng hiăng mơjiâng khu rĕng ƀă pêi pro mâu troăng mơdât pơreăng tiô pơkâ. Klêi séa ngăn, ai 40 to chu dêi pôa Mai Thanh Sự a tôh kuăn pơlê kơphô̆ Đồng Tiến ai tơngê, lôi kâ, lo mơheăm a kéa ƀă tro rong. Klêi kơ’nâi châ tơƀrê, khu râ kăn pơkuâ hiăng hdró kơpong, tơkŭm po prâu tah tâi tâng khu chu tiô pơkâ, tơdrêng amê mơgrúa, xôh pơkeăng kơdê pơreăng a kơpong ki păn ƀă trếo pơkeăng ƀă xế puâ.

Rơtế ƀă tơdroăng mơdât pơreăng, bêng Đông Gia Nghĩa thăm séa ngăn a kơpong ai pơreăng ƀă mâu kơpong ki achê mê; pơtâng tối, hnê mơhno kuăn pơlê xúa mâu troăng păn mơnăn mơnôa tơniăn sinh hok, ôh tá pơto, tê rôe lơ kơdê chu tro tâ pơreăng.