Kơnôm ing mâu tơdroăng cheăng ki pơkâ mơ’no mơhnhôk tung tê mơdró kâ châ tơkŭm po tung roh Hôp mơhnhôk mơ’no liăn cheăng dêi kong pơlê Dak Lak hơnăm 2026 pơla hdrối kố nah, ai lối 150 to kế tơmeăm dêi 80 khu mơdró kâ, khu pêi cheăng tơrŭm ƀă mâu tíu ki uâ mơdi, tê mơdró tung kong pơlê, ƀă kong pơlê ki ê hiăng mơhno tối hên mâu kế tơmeăm ki kơnâ, trối kơphế, ca cao, mắc ca, kloăng  tiu, têa kơdruâ, pơkeăng, kế kâ ki uâ mơdi, mâu tơmeăm ki mơjiâng pro ƀă kŏng rơtế ƀă hên mâu tơmeăm OCOP ƀă tơmeăm ki châ mơjiâng pro ƀă kơmăi kơmok ki dâi lĕm dêi thôn pơlê. Kố châ ngăn cho roh ki tơ’lêi vâ mâu kuăn pơlê châ mơjiâng dêi inâi kế tơmeăm mơdró, tăng khu ki tơrŭm tê mơdró, po rơdâ mơ’no tê dêi kế tơmeăm pêi lo ing chiâk deăng. Kăn teăng mâ môi Khu ngăn ‘na pêi cheăng tơrŭm, pôa Nguyễn Duy Hùng tối ăm ngin ‘nâi, kơnôm châ kong pơlê tŏng gum hlâu tung tơdroăng veăng châ hôp a mâu roh hôp ‘na tê mơdró kâ hiăng gum ăm mâu khu râ, kơvâ cheăng ki pêi mơjiâng OCOP châ tê mơ’no troh kuăn pơlê ƀă khu ki tơrŭm chơ pơto, tê mơdró kế tơmeăm.

 “Roh po kơchơ kố cho tơ’lêi hlâu ‘nâng. Mâu ngế ki pêi mơjiâng OCOP châ tối mơnhên cho rơkê ‘nâng ing tơdroăng ki tơkŭm po ƀă tơdroăng ki vâ tơbleăng tối. ƀă ki rơhêng vâ tối, mê cho môi roh ki kong pơlê Dak Lak tối tơbleăng, mơnhên hdró ƀă mơ’no liăn cheăng dêi kong pơlê roh kố, mê kô tơ’mot hên mâu tơmối troh akố vâ châ hlê plĕng ƀă ngin xuân hiăng tơbleăng tê hên kế tơmeăm”.

Pakĭng tơdroăng tơrŭm tê mơdró tiô túa khôi hmâ sap ing hdrối mê hía nah, kong pơlê Dak Lak ối tơveăng gum khu mơdró kâ, khu pêi cheăng tơrŭm xúa mâu tơdroăng, kế tơmeăm tung măng internet ƀă châ mơ’no tê dêi kế tơmeăm. Mâu roh ki tê mơdró tung măng, tơdjêp tung pơla xúa kơxô̆ gum pêi mơjiâng kế tơmeăm châ troh a mâu ngế ki rơhêng vâ rôe thăm rế tơ’lêi, hlâu tâ, rĕng tâ, hên lâp lu tâ, ing mê, tơveăng gum pro pơxúa khât tung tơdroăng châ tê mơ’no dêi kế tơmeăm. Veăng tung tơdroăng tê kế tơmeăm tung măng internet, jâ Lê Thị Hồng Thơm, kăn teăng mâ khu mơdró kâ tê mơdró phom, têa kơlôn ing nhâ loăng dêi cheăm Čư Prao, kong pơlê Dak Lak tối ăm ngin ‘nâi:

 “Roh kố, cho roh po kơchơ ki xúa măng internet ki apoăng dêi kong pơlê Dak Lak klêi kơ’nâi tơ’mot mâu cheăm, bêng. Tơdrêng ƀă tơdroăng ki djâ dêi kế tơmeăm mơđah mơhno, tê mơdró a kơchơ ƀă mâu troăng hơlâ tiô khôi hmâ ahdrối mê hía nah vâ mơ’no tê tung măng internet, mê peăng Kŏng ti ngin ối veăng roh ki koai um mơ’no tơdrêng tung roh ki xúa măng internet xua ing khu ki ngăn ‘na mơhnhôk mơ’no tê mơdró kâ ƀă Tíu xiâm ki Hnê mơhnhôk tê mơdró dêi kong pơlê tơveăng gum. Pói rơhêng vâ châ mơđah, tơbleăng dêi kế tơmeăm tơná tiô hên mâu khu râ, kơvâ cheăng pơrá phá dêi pó ƀă xuân chiâng vâ châ tê mơ’no troh kuăn pơlê hên tâ ing hên kơvâ cheăng pơrá phá dêi pó, mâu khu râ phá dêi pó”.

Tiô pôa Nguyễn Hải Triều, Phŏ Ngăn Khu tê mơdró-cheăng kơmăi kơmok kong pơlê Dak Lak tối ăm ngin ‘nâi, ki xiâm dêi kong pơlê ôh tá xê pơtê to dâng tơdroăng thăm pêi mơjiâng kế tơmeăm, mê ối rơtế prôk ƀă khu mơdró kâ, khu pêi cheăng tơrŭm ƀă kuăn pơlê tung mơjiâng inâi, tơdjêp tung pêi mơjiâng, mơ’no tê, rôe xúa, thăm mơnhông ‘na kơvâ tê mơdró ƀă mơnhông tíu ki tê mơdró a kơchơ. Kố châ ngăn cho troăng hơlâ ki kal vâ thăm mơdêk ki kơnía git dêi kế tơmeăm, thăm mơnhông tơdroăng ki tơbriât tê dêi kế tơmeăm ƀă tơ’mot khu ki mơ’no liăn cheăng mot tung kơvâ ki tê uâ mơdi, châ mơ’no tê dêi kế tơmeăm.

Tơdroăng ki pơkal athế pêi pro dêi kong pơlê ƀă mâu khu mơdró kâ, ôh tá xê to hnoăng cheăng ki mơjiâng pro mâu kế tơmeăm ki dâi khât, mê ối athế tơkŭm pêi pro lĕm tro mâu tơdroăng cheăng ki tơrŭm pơla mơ’no tê, rôe xo, thăm mơnhôk tơdroăng tê mơdró ƀă mơjiâng inâi ki vâ mơnhông châ tê mơ’no dêi kế tơmeăm a hngêi kơchơ. Xua ti mê, xua ing mâu roh po kơchơ kố, kong pơlê Dak Lak xuân pói rơhêng vâ tối tơbleăng môi túa cheăng ki tơtro khât, tơ’lêi hlâu, mơnhông mâu troăng hơlâ ki tơtêk tung kơvâ cheăng chiâk deăng dêi thôn pơlê, dêi kong pơlê. Tơdrêng amê, kô pro tơ’lêi hlâu tung tơrŭm cheăng ƀă mơđah tơbleăng inâi, tí tăng khu tơrŭm cheăng ƀă pêi pro troh tơrŭm veăng mơ’no liăn pêi cheăng kâ”.

Ing tơveăng gum thăm mơdêk ki dâi lĕm dêi kế tơmeăm pêi mơjiâng mê tơrŭm ƀă mâu hngêi kơchơ, xúa mâu tơdroăng chêh tối tung măng internet ƀă mơjiâng inâi, tơdroăng ki rơtế pêi pro dêi khu kăn hnê ngăn rơtế ƀă mâu kơvâ cheăng dế thăm tơbêng tơ’nôm ivá cheăng vâ kuăn pơlê, khu ngăn pêi cheăng tơrŭm ƀă khu mơdró kâ thăm mơdêk ki kơnâ dêi kế tơmeăm. Kố xuân cho ki xiâm ki kal kân khât vâ kơvâ ngăn ‘na chiâk deăng dêi kong pơlê Dak Lak châ mơnhông tro tiô troăng hơlâ chal nếo, krá tơniăn ƀă thăm mơdêk ivá ki kâi tơrŭm tê mơdró tung tơnêi têa ƀă kong têa ê.