Xông tơpui a Hôp tơno tơdroăng kal, pôa Trần Thanh Mẫn, Kăn xiâm hnê ngăn Kuô̆k hô̆i tối, tơdroăng ki kal tơbleăng Pơkâ pêi tâi tâng pơlê kong xiâm Hà Nội tơmiât la ngiâ 100 hơnăm ôh tá xê tơbleăng môi pơkâ pêi, mê ối tơbleăng pơtâng hnê tối ‘na pơkâ khŏm pêi pro, mơhno inhên tơdroăng khŏm mơ-eăm kal kí dêi pơlê kong kân tung tơdroăng djâ Tơdroăng pơkâ Hneăng hôp má 14 dêi Đảng, Tơdroăng pơkâ Hneăng hôp Đảng ƀô̆ pơlê kong kân rôh má 18 tung tơdroăng rêh ối, tro ƀă hnê mơhno dêi pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn Tơnêi têa “Hà Nội hiăng tối cho pêi, pêi rĕng, pêi tro, pêi châ tơƀrê, pêi troh tá tui lui’’.

Kăn xiâm hnê ngăn Kuô̆k hô̆i pơkâ thế, Chin phuh, mâu khu xiâm, kơvâ cheăng Tơnêi têa ƀă mâu kơ koan ki tơdjâk troh pơtối tơrŭm krá tơniăn ƀă Hà Nội tung tơdroăng pêi pro troăng pơkâ pêi, troăng hơlâ ki phá tơ-ê; teăm tơdrêng hnê mơhno, tah lôi mâu tíu ki kreăng ‘na troăng pơkâ pêi, troăng hơlâ, tơniăn tơdroăng môi tuăn tung tơkŭm pêi pro.

Rêm troăng pơkâ pêi, troăng hơlâ hiăng châ Kuô̆k hô̆i tơbleăng thế châ pêi pro môi tuăn, châ tơƀrê, mot tung tơdroăng rêh ối; rêm kơxô̆ liăn châ pơcháu ƀă xúa tro tơdroăng, tro luât, xua tơdroăng mơnhông dêi tơnêi têa ƀă hơniâp lĕm dêi kuăn pơlê.