Tơdah Kăn teăng mâ Canada, Ngế pro xiâm hnê ngăn tơnêi têa mơnhên, Việt Nam ngăn Canada cho khu tơrŭm ki kal ƀă pói vâ mơnhông mơdêk ki kal ƀă pói vâ mơnhông tơrŭm tâi tâng rế hía rế krá tơniăn, tơmiât la ngiâ rĕng djâ tơrŭm to a râ a’ngêi nếo. Ngế pro xiâm hnê ngăn tơnêi têa pơkâ thế Canada pơtối lôu péa tê mơdró kế tơmeăm Việt Nam, ki má lối cho mâu tơmeăm pêi lo ing chiâk deăng – tơmeăm mơjiâng ing loăng – ká xi xŏng; thăm tơrŭm hnê mơjiâng mơngế pêi cheăng tung mâu kơvâ kơmăi kơmok rơxông nếo.

Péa pâ pơtối tơrŭm krá tơniăn, châ tơƀrê, tŏng gum dêi pó a mâu khu tơrŭm cheăng, hôp tơno kơpong ƀă lâp plâi tơnêi, ki rơhêng vâ tối tung Tơdroăng kĭ tơkêa Khu tơrŭm cheăng Tâi tâng ƀă Rơkê (CPTPP) ki Việt Nam pro Kăn hnê ngăn hơnăm 2026 ƀă Hôp tơno Khu tơrŭm cheăng kâ Châu Á – Thái Bình Dương (APEC) ki Việt Nam pro Kăn hnê ngăn hơnăm 2027.

Tơdah Kăn teăng mâ Hàn Quốc, Ngế pro xiâm hnê ngăn tơnêi têa mơnhên Chin phuh Việt Nam kô pro tơ’lêi hlâu rêm ngế ăm mâu khu tê mơdró kong têa ê, tung mê, ai khu tê mơdró Hàn Quốc hmiân tuăn mơ’no liăn tơniăn, ton xŏn a Việt Nam. Pôa pơkâ thế péa pâ thăm tơrŭm cheăng khôi túa lĕm tro ƀă tŏng gum Việt Nam mơnhông mơdêk kơvâ kơmăi kơmok khôi túa lĕm tro; po rơdâ kơvâ trâm mâ tơpui tơno kuăn pơlê ing tơdroăng tơdah mơngế pêi cheăng Việt Nam troh Hàn Quốc pêi cheăng.

Tơdah kăn teăng mâ kong têa Australia, pôa Lê Minh Hưng, Ngế pro xiâm hnê ngăn tơnêi têa tối phiu ro drêng ai tâi tâng 6 kơvâ ki xiâm tung Tơdroăng pêi cheăng pêi pro tơrŭm cheăng Ton xŏn tâi tâng Việt Nam – Australia hneăng hơnăm 2024 – 2027 pơrá châ pêi pro tro tơdroăng pơkâ, troh nôkố hiăng pêi kêi đeăng châ 96%. Tối nhên péa tơnêi têa ối hên tơnêi ki rơlối tơrŭm cheăng, Ngế pro xiâm hnê ngăn tơnêi têa pơkâ thế péa pâ pêi pro mâu troăng mơnhông mơdêk pêi pro tơdroăng pơkâ pêi lo liăn tê mơdró tâk 20 rơtal dollars ƀă tâk châ péa xôh mơ’no liăn cheăng péa pâ tung la ngiâ.