Hên hơnăm kố, ngê̆ nhân Phạm Văn Rôm ối a cheăm Ba Vinh, kong pơlê Quảng Ngãi tâi ihiâm mơno hnê ngê̆ thuât mơđah tơbleăng Chêng Pái Kơtâ ăm rơxông nếo mơngế H’rê. Pôa ăm ‘nâi, kố cho prôa hơkâ ki phá má môi dêi mơngế H’rê, djâ ki kơnâ loi tĭng, cho loăng rek hdró tơdroăng ki kro mơdrŏng ƀă tíu ối dêi kăn rơpŏng tung pơlê pơla:

“Má môi pin rak ƀă rak vế khôi túa lĕm tro dêi kuăn pơlê mơngế H’rê ngin. Má péa, ngê̆ thuât Chêng Pái Kơtâ ai sap ing ton nah, xua mê Chêng 3 Kơtâ dêi mơngế H’rê ai kơnâ má môi, pin thế rak ki kơnâ khôi túa lĕm tro dêi kuăn pơlê H’rê’’.

Ngê̆ thuât mơđah tơbleăng Chêng Pái Kơtâ dêi mơngế H’rê hiăng châ mơnhên cho tơmeăm kơnía khôi túa lĕm tro ‘na ihiâm mơno tơnêi têa. Jâ Trần Thị Thanh Thúy, Phŏ Kăn hnê ngăn Vi ƀan cheăm Ba Vinh tối ăm ‘nâi, cheăm pêi pro tơdroăng tơkêa bro rak vế, mơnhông ki kơnâ tơmeăm kơnía kố tung xúa tơmeăm ôm hyô. Troh nôkố, cheăm hiăng mơjiâng châ 4 khu khôi túa lĕm tro – rơhdruê xuăng a 4 thôn ƀă dế pơtối mơjiâng tơdroăng tơkêa bro rak vế, rak ngăn ƀă mơnhông ki kơnâ Chêng Pái Kơtâ rơtế mâu tơdrá xuăng tiô khôi vâi krâ nah dêi vâi droh phô̆m xông kân hdrông H’rê. Cheăm hiăng po hên lâm hnê ngê̆ thuât Chêng Pái Kơtâ ƀă tơdroăng Teăn ếo pơtâk, vâ rak vế mâu ki kơnâ dêi khôi túa lĕm tro vâi krâ nah dêi mơngế H’rê, gum mơnhông ôm hyô pơlê pơla, mơjiâng cheăng pêi ăm kuăn pơlê:

‘’Kố cho mâu tơdroăng pêi châ tŏng gum ing Tơdroăng pơkâ xiâm tơnêi têa ƀă kô pơtối po rơdâ ƀă pro chiâng tơmeăm ăm kuăn pơlê ‘na ton xŏn. Cheăm pói vâ kô pêi pro tâi mâu tơdroăng vâ mơ’no liăn mơjiâng pro tơmeăm ki xiâm ăm kuăn pơlê ing mâu lâm hnê môi tiah kố’’.

Ing tơdroăng pơkâ xiâm tơnêi têa, hên ki kơnâ khôi túa lĕm tro vâi krâ nah dêi kuăn pơlê hdrông kuăn ngo Cor xuân dế châ rak ƀă mơnhông. A mâu cheăm kơpong kong ngo kong pơlê Quảng Ngãi, mâu tơdroăng ngê̆ thuât môi tiah tơ’noăng chêng, xoăng Cà đáo, mơdâng loăng kâng rơtế mâu leh hô̆i tiô khôi vâi krâ nah châ vêh bro, hnê ăm mâu rơxông ối nếo. Hên hơnăm kố, Ngê̆ nhân Nhân yân Hồ Ngọc An a cheăm kong ngo Trà Bồng kơhnâ ƀă tơdroăng hnê khôi túa lĕm tro Cor tung hngêi trung hriâm. Pôa phiu ro drêng rế hía rế hên pú hmâ hơnăm ối nếo hâk vâ khôi túa lĕm tro hdrông kuăn ngo.

“Cho hâk tơngăm ‘nâng drêng châ ăm hdrông kuăn ngo pin, rak ngăn ƀă rak vế. Á xuân cho ngế ki tơdrêng hnê ăm mâu muăn hok tro môi tiah hngêi trung ai tíu kâ koi ối pơtê Trà Bồng xua mê á hlo sôk ro. Rêm leh hô̆i Ngả Rạ dêi mâu hngêi trung vâi pơrá tơkŭm po ai khôi túa lĕm tro dêi kuăn pơlê mơngế Cor’’.

Mơnhên khôi túa lĕm tro cho xiâm kối vâ mơnhông ôm hyô krá tơniăn, mâu cheăm kong ngo tung kong pơlê Quảng Ngãi hlối rak vế tơmeăm kơnía ƀă mơnhông ôm hyô pơlê pơla, chôa ‘lâng mơjiâng cheăng pêi ăm kuăn pơlê. Pôa Đỗ Khắc Phi, Phŏ Kăn hnê ngăn Vi ƀan cheăm Trà Bồng, mơnhên tối:

“Ing kơxô̆ liăn Tơdroăng tơkêa bro 6 dêi Tơdroăng pơkâ xiâm tơnêi têa mơnhông mơdêk cheăng kâ rêh ối pơlê pơla kơpong kuăn pơlê hdrông kuăn ngo, Vi ƀan cheăm hiăng tơkŭm tŏng gum vâ mơ’no liăn xuân môi tiah pêi pro tơtro tơdroăng rak vế mâu tơmeăm kơnía khôi túa lĕm tro tung cheăm. Ki nhên cho hnê mâu tơmeăm kơnía lĕm tro; rôe tŏng gum kế tơmeăm khoăng xuân môi tiah mơ’no liăn rôe kế tơmeăm khôi túa lĕm tro ăm mâu thôn. Tung la ngiâ, ngin kô pơtối tơkŭm mơngế ing mâu tơdroăng pêi, vâ mơnhông cheăng kâ - rêh ối pơlê pơla kơpong kuăn pơlê hdrông kuăn ngo ƀă kong ngo’’.