Ai mâ a kơpong pro pơlê nếo sap ing kơxo má, pôa Nay Ơn, kuăn pơlê ki ối a ƀuôn Nông Siu, cheăm Ia Dreh, phiu ro drêng rup kơxô̆ tíu ối nếo. Pôa ăm ‘nâi, hên hơnăm hdrối, rơpŏng pôa rêh ối tung kơpong ki hmâ tro to têa lân lu a rơnó mê hngê. Rôh kố, pôa cho môi tung 20 rơpŏng kuăn pơlê a mâu pơlê Ia Klon, Gom Gốp, Bhă Nga ƀă Blăk châ kơjo gum xoăng ăm tíu ối nếo hdrối rơnó mê hngê.

Kơpong ki pro pơlê Ia Dreh kố ai ƀăng tơnêi 5,77 ha, tâi tâng kơlo liăn ‘no 125 rơtal liăn, nôkố hiăng pro klêi hngêi trăng, troăng klông, trăng kơxái on tơhrik châ dâng 75% ƀă tơdroăng ki tâp tơneăn hdró xoăng tơnêi hiăng klêi. Pôa Nay Ơn, ăm ‘nâi:

 “Tíu ối ton gá ôh tá tơniăn, hmâ trâm têa lân lu, tôu tuăn khât. Nôkố tơnêi têa pro tơ’lêi hlâu ăm rêm rơpŏng lăm ối a mâu tíu ki tơniăn. Á phiu ro khât ƀă mơnê tơnêi têa hiăng tŏng gum”.

Ôh tá xê to a Ia Dreh, 953 rơpŏng kuăn pơlê ối tung kơpong ki hmâ tro kong mê khía mơhot têa kân lân lu a mâu cheăm Ia Tul, Ia Hiao, Ia Rsai, cheăm Uar, Đăk Song ƀă Ia Ly xuân hiăng châ xoăng tíu ối nếo tơniăn, rế hía rế ai xếo tơdroăng ki xâu rơ-iêo rêm rơnó kong mê khía mơhot troh.

Gia Lai cho pơlê xiâm dêi Pơtáu Quang Trung. “Cheăng pêi thâ Quang Trung” châ kong pơlê Gia Lai tơbleăng pêi sap ing nôkố troh hâi lơ 15/12/2026, ki xiâm cho vâ djâ tâi tâng kuăn pơlê lo ing mâu kơpong ki mơni tơ’lêi tro tơhnah tơhnâp, têa lân lu drêng kong mê khía mơhot. Tung lâp kong pơlê tơbleăng pêi 16 tơdroăng tơkêa bro, túa pơkâ xoăng, ăm kuăn pơlê ai tíu ối tơniăn drêng lo ing kơpong ki hmâ tro kong mê khía mơhot têa lân lu.

Tung mê, kơpong peăng mâ hâi Lâ kong pơlê ai 7 to tơdroăng tơkêa pro pơlê ối ai tâi tâng kơxô̆ liăn ‘no lối 875 rơtal. Mâu kơpong pro pơlê ối châ ‘no liăn pro tơdâng tơ’mô mâu troăng prôk, on tơhrik, tíu hdoăng mơ’no têa krúa, krâ pul on ăm trâ eăng a kong măng, hngêi trung hriâm, hngêi hôp tơdjuôm ƀă mâu kế tơmeăm xúa kal ki ê, pro ivá vâ kuăn pơlê tơniăn tung tơdroăng rêh kâ ối ton troh tá ah.

Vâ rak tơniăn tơdroăng ki pro, Vi ƀan hnê ngăn kong pơlê Gia Lai pơkâ thế pro klêi hdrối hâi lơ 31/8, pơcháu tâi tâng hngêi ối hdrối hâi lơ 30/11 ƀă kô pêi pro klêi tâi tâng tơdroăng ki ‘mâi xĕn kuăn pơlê hdrối hâi lơ 15/12. Ƀă mâu rơpŏng ki ôh tá liăn ngân pro xêh hngêi ối, mâu cheăm bêng kô pơtroh ngế gum cheăng, kế tơmeăm, liăn ngân pêi pro tiô pơkâ “diâp khoă a kŏng”, kuăn pơlê ai hngêi ối hlối klêi kơ’nâi tơmeăm kố pro klêi. Pôa Dương Mah Tiệp, Phŏ hnê ngăn Vi ƀan kong pơlê Gia Lai pơkâ thế:

“Khu pơkuâ ngăn ‘no liăn mơjiâng pro dêi kong pơlê ƀă mâu khu ki xo pro tơkŭm pơtroh mâu kơmăi kơmok, rơxế, kế tơmeăm vâ rĕng pro klêi ƀă rak tơniăn troăng pro. Vi ƀan hnê ngăn cheăm pêi pro tro cheăng hnê tối mơhnhôk pro chiâng tơdroăng ki môi tuăn tung kuăn pơlê, teăm gum tơdrêng mâu tơdroăng xơpá ối tung hnoăng pơkuâ ƀă pơcháu tơnêi athế rak tơniăn tơdrăng, tro pơkâ. Tơdrêng amê hlối hbrâ mâu kơxô̆ liăn ki tro luât tiô tơdroăng ki mơhnŏng vâ gum xêh vâ ăm kuăn pơlê pro hngêi ối, kơjo gum mâu rơpŏng kơtiê, rơpŏng ki ai tơdroăng rêh ối pá puât, rơpŏng ki ôh tá ai liăn ngân vâ pro hngêi ối”.