Riân troh hâi lơ 28/7, kong pơlê Lâm Đồng hiăng pơxâu phâk 116/365 tơdroăng tơkêa bro ki ối tơvâ tơvân, pro xiâm tung mơnhông cheăng kâ - pơlê pơla. Tung mê, 31 tơdroăng tơkêa bro hiăng pêi klêi ƀă  xúa; 24 tơdroăng tơkêa bro hiăng xo tơvêh, pơtê tơdroăng djâ lo ing khu tăng ngăn; 61 tơdroăng tơkêa bro châ pơtối pêi nếo lơ dế pê klêi mâu hlá mơ-éa tro luât vâ pơtối tơbleăng pêi. Mâu tơdroăng tơkêa bro hiăng ai tơnêi lối 8/700ha  ƀă tai tâng kơxô̆ liăn ‘no pêi vâ chê 25.800 rơtal liăn.

Ƀă 249 tơdroăng tơkêa bro ối tơvâ tơvân, kong pơlê Lâm Đồng klâ túa hên khu vâ tơmâng pêi, mê cho tơdroăng tơkêa bro dêi Tíu xiâm ngăn, dêi mâu kăn kong pơlê; tơdroăng tơkêa bro ki hdi pơkâ hdró tơmeăm khoăng kơdâm tơnêi; tơdroăng tơkêa pro ki tro tơdjâk dêi mâu hlá mơ-éa chêh pro troăng hơlâ luât pơkâ, tơdroăng pơkâ mơ’no ki nếo; mâu tơdroăng tơkêa bro ối tơvâ ‘na ‘no liăn pro, tơnêi tíu, mơjiâng tơmeăm khoăng… ƀă hên ki ê.

Ƀă mâu tơdroăng tơkêa bro ki kong pơlê pơkuâ, mâu tíu pêi cheăng, kơvâ cheăng thâ tăng ngăn, tối nhên tơrêm tơdroăng tơkêa vâ ai troăng hơlâ tah ki xơpá ăm tơtro.