Koh phiu ro jâ Khuon Sudary, Kăn xiâm hnê ngăn Kuô̆k hô̆i kong têa Kul, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa mơnhên Việt Nam đi đo nhuô̆m ƀă kơjo má môi ăm tơrŭm cheăng ‘’kong têa achê dêi pó lĕm tro, tơrŭm nhŏng o tiô khôi vâi krâ nah, tơrŭm tâi tâng, krá tơniăn ton xŏn’’ ƀă Kul.

Péa pâ tối nhên ki khá kơnâ troăng pêi cheăng ton xŏn dêi tơrŭm cheăng pơla pái tơnêi têa Việt Nam – Kul – Lếo tung tơdroăng nếo nôkố; ki má môi cho tơdroăng loi tơngah kal kí, tơrŭm krá ƀă gâk kring tơnêi têa – kring tơniăn, tơdjêp cheăng kâ ƀă trâm mâ kuăn pơlê. Péa ngế kăn xiâm pơkuâ pơto hnoăng troăng prôk la ngiâ ton xŏn dêi Đảng tung tâi tâng tơrŭm cheăng pơla péa pâ ƀă pái pâ, hnê mơhno mâu khu xiâm, kơvâ cheăng ki nhên pêi pro mâu tơdroăng môi tuăn hiăng châ tơƀrê.

Tơdrêng amê, péa pâ môi tuăn pơtối mơnhông châ tơƀrê mâu troăng pơkâ pêi tơrŭm ki xiâm, ki má lối cho mâu rôh trâm mâ pơla pái Ngế pro xiâm hnê ngăn tơnêi, pái Kăn xiâm hnê ngăn Kuô̆k hô̆i, pái Ngế xiâm pơkuâ gâk kring tơnêi têa, Kŏng an/Kat sát ƀă Tơpui kâ ƀă kong têa ê.