Khu kăn teăng mâ Kuô̆k hô̆i kong pơlê Dak Lak hiăng séa ngăn tơdroăng po rơdâ pêi pro Luât tơnêi tơníu hơnăm 2024 a Khu pơkuâ ‘na pêi chiâk deăng ƀă Kong prâi vâ mơnhên tơdroăng châ tơƀrê pêi pro luât, mơnhên mâu tơdroăng pá puât, tơvâ tơvân tơdroăng ki pá ing tơdroăng nôkố vâ gum tung tơdroăng ‘mâi rơnêu, kêi đeăng troăng hơlâ, luât ‘na tơnêi tơníu tung la ngiâ.

A rôh séa ngăn, mâu ngế pêi cheăng tung Khu kăn teăng mâ Kuô̆k hô̆i kong pơlê Dak Lak tơpui tơno, mơnhên inhên mâu pá puât, tơvâ tơvân tung tơdroăng pêi pro Luât tơnêi tơníu hơnăm 2024, ki má lối tơdroăng pro mơ-éa mơnhên hnoăng xúa tơnêi, tăng ƀăng tơnêi, mơjiâng ‘noăng chư chêh tơnêi tơníu ƀă pêi pro xing xoăng râ, xing xoăng hnoăng tung troăng pêi khu râ kăn pơkuâ péa râ.

Xông tơpui mơgêi, jâ Lê Đào An Xuân, Phŏ Kăn pơkuâ khu pơkuâ Khu kăn teăng mâ Kuô̆k hô̆i kong pơlê Dak Lak pơchân, tung pơla thăm xing xoăng râ, hnoăng ƀă mơnhên troăng la ngiâ mơjiâng luât tiô túa, Khu pơkuâ Pêi chiâk deăng ƀă Kong prâi kô pơtối thế hbrâ tơbleăng, kêi đeăng mơ-éa ối tung hnoăng dêi kong pơlê vâ tơniăn tơdroăng tơkŭm po pêi pro Luât Tơnêi tơníu châ tơƀrê, môi tuăn ƀă tơtro ƀă pơkâ nôkố.