Pá puât kân má môi nôkố cho a tơdroăng mơhnhôk ƀă rak chêng ƀok thái pơkeăng a mâu kơpong hơngế, hơhngo, kơpong kuăn pơlê hdrông kuăn ngo xua tơdroăng ki mơhá liăn tá hâi tŭm rơdêi ƀă kơmăi kơmok vâ khăm pơlât ối iâ. Lâp kong pơlê ai 135 hngêi pơkeăng cheăm ƀă 369 tíu khăm pơlât. Mơhé 100% hngêi pơkeăng cheăm hiăng ai ƀok thái pơkeăng pêi cheăng, laga ki nhên khât kong pơlê xuân tá hâi tŭm vâ chê 500 ngế.

Pakĭng mê, troăng pêi cheăng khu râ kăn pơkuâ péa râ pro Vi ƀan kuăn pơlê râ cheăm xuân tá hâi bro ti lâi tung pơkuâ tơdroăng cheăng, tá hâi ai hên túa ki rơkê tơtro tung há yă pơkeăng xuân môi tiah ăm pêi cheăng hngêi pơkeăng cheăm môi tíu môi tíu pêi cheăng tơniăn krê.

Drêng ai mâu tơdroăng kố, a rôh pêi cheăng nếo achê kố ƀă Khu râ kăn séa ngăn chuyên đê dêi Vi ƀan Kuăn pơlê pói vâ dêi Kuô̆k hô̆i, Vi ƀan kong pơlê Gia Lai hiăng pâ thế Tíu xiâm tơnêi têa rĕng tơbleăng hnê mơhno môi tuăn ‘na tíu pêi cheăng, kơlo mơngế pêi cheăng tiô pơ’leăng mâ mơngế ƀă ki phá tơ-ê dêi pơlê; tơdrêng amê, tŏng gum kơxô̆ liăn mơ’no tơdâng tơ’mô hngêi trăng, troăng klông, kơmăi kơmok khăm pơlât. Tối nhên ki phá tơ-ê rơtế mâu tơdroăng tô tuăn dêi cheăm, jâ Nguyễn Thị Thanh Lịch, Phŏ Kăn hnê ngăn Vi ƀan kong pơlê Gia Lai tối:

"Kong pơlê tơbleăng hên troăng hơla ‘na mơhnhôk laga ôh tá ai ƀok thái pơkeăng troh pêi cheăng. Vêh tíu xiâm khăm pơlât, ‘na hngêi pơkeăng hiăng pá, ƀă vêh a cheăm mê vâi ôh tá vêh ôh. Nôkố, kơlo mơhnhôk mơngế pêi cheăng hên má môi dêi ngin cho 600 rơtuh liăn ăm môi ƀok thái pơkeăng ƀă tŏng gum liăn mung hngêi ối. Ngin hiăng pro pơkâ pêi vâ pơtroh pêi cheăng, khu ki pêi cheăng pơtân, pơhlêh dêi pó tíu pêi cheăng. Xua tâng djâ troh pêi cheăng ôh tá ai kơmăi kơmok, ôh tá xúa mê kô mơ’nhê tê kơtê mơngế pêi cheăng, tơdrêng amê a hngêi pơkeăng râ kơpêng, ngin dế ôh tá tŭm’’.

Kheăn kơdeăn tơdroăng ki tơdrăng dêi kong pơlê Gia Lai tung tơdroăng mơnhên mâu tơdroăng ki u ối, Khu séa ngăn mơnhên Gia Lai cho môi tung mâu kong pơlê prôk hdrối tung tơdroăng tơbleăng mâu pơkâ mơhnhôk ƀok thái pơkeăng. Laga, Khu xuân hiăng pơchân kong pơlê kal mơdêk ki dâi lĕm tíu pêi cheăng, mơjiâng troăng vâ châ rế luâ, to kơlŏng ƀă hnê mơjiâng hriâm kân tâ đăi hok vâ mâu ƀok thái pơkeăng hmiân tuăn. Jâ Trần Thị Nhị Hà, Phŏ Kăn pơkuâ Vi ƀan Kuăn pơlê pói vâ dêi Kuô̆k hô̆i, Kăn pơkuâ khu séa mơnhên tối rơdêi:

"Gia Lai kal ai troăng pêi ki lâi, troăng hơlâ ki lâi vâ tŭm rơdêi vâ tah lôi mâu pá puât, kong pơlê pâ thế. Khu râ kăn séa ngăn kô hvái ngăn tâi tâng ƀă ôh tá tơdjâp pakong vâ rơtế dêi pó tah lôi pá puât. Tâi tâng pơrá tơmiât ‘na kuăn pơlê, pro ti lâi vâ kuăn pơlê păng ‘nâng châ xúa mâu troăng hơlâ ki kăn pơkuâ Đảng, Tơnêi têa dế pói tơngah ƀă pói vâ’’.

Tơdroăng rơtế ƀă tơmâng ing Kuô̆k hô̆i kô cho kế ki mơnhông ki kal vâ Gia Lai chôa ‘lâng tah lôi “tíu kât krá” mơngế, pro krá xiâm rêi tơdroăng khăm pơlât, tơxâng tơdroăng pói vâ dêi kuăn pơlê tíu kơpong kân rơdâ Tây Nguyên. “Tơdroăng hơ’muăn tơdroăng nếo ai” hâi kố troh a kố hiăng tâi. Mơnê pó vâi krâ nhŏng o ƀă pú hmâ hiăng tơmâng.