*Tơpui hnê mơhno, Pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tối nhên, Rôh hôp Tơnêi têa 3 hiăng môi tuăn hên tơdroăng ki kal, pơkâ hên troăng hơlâ pêi ki kân ‘na mơjiâng Đảng, khu xiâm ngăn cheăng kal kí, mơnhông ƀă rak vế tơnêi têa. Kố cho hvêa chêng prôk ki nhên kal khât Pơkâ Hneăng hôp XIV dêi Đảng, tro ƀă hnoăng cheăng hơnăm 2026 ƀă ki xiâm pơkâ pêi tá hneăng pêi cheăng, troh hơnăm 2030, hơnăm 2045.

Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa pơkâ thế rêm râ Đảng rĕng pêi pro pơhlêh tơdroăng Pơkâ chiâng tơdroăng pêi pro tiô tơdroăng ki ai khât, ki kal, nhên kơjo gum ƀă tơtro ƀă rêm tơdroăng pơkâ dêi khu xiâm, kơvâ cheăng, kong pơlê. ‘Na kăn pơkuâ kong pơlê 2 râ, Tơnêi têa ôh tá pơkâ tơdroăng ki tơkŭm tơnêi tơníu pêi cheăng râ cheăm vâ rak vế kơ koan cheăng pêi cheăng tơniăn; cheăng ‘mâi pơhlêh mơ’no drêng kal khât, athế rơkê, tơtrŏng, tơmiât troh tơdroăng ki gum kuăn pơlê tơniăn tro tâ ƀă khŏm mơ-eăm tah lôi tuăn tơmiât “tơ’lêi ăm kăn ƀô̆, pá ăm kuăn pơlê”.

Kăn xiâm pơkuâ hnê ngăn cheăng Đảng tối nhên, tung 6 khế mơ’nui hơnăm 2026, tâi tâng khu pơkuâ athế rak tơniăn kơ koan pơkuâ cheăng rơkê plĕng, tơkŭm pơkâ tơleăng klêi mâu tơdroăng ki tro kreăng kal pêi tơdrêng, khŏm mơ-eăm pêi klêi ƀlêi chiâng mâu pơkâ pêi mơnhông cheăng kâ rêh ối pơlê pơla hiăng mơ’no.

*Xúa drêng pro lé lĕm rah nếo mâu kăn pêi cheăng vâ xo ngế ki ôh tá rơkê, ôh tá nhoăm mot pêi cheăng tung khu kăn”.

Kơxo hâi lơ 29/7, Khu kăn Xiâm Đảng mơ’no thế pơkâ kơxô̆ 207-QQĐ/TW ‘na mâu tơdroăng ki đảng viên ôh tá chiâng pêi (teăng pơkâ kơ xô̆ 37-QĐ/TW). Tơbleăng a rôh Hôp tâi tâng tung lâp tơnêi têa pêi pro tiô Hlá mơ-éa chêh troăng hơlâ luât pơkuâ dêi Tíu xiâm 3 hneăng 14, pôa Trần Sỹ Thanh, Ngế pơkuâ Vi ƀan Tí tăng séa ngăn Tíu xiâm tối nhên hên tíu ki nếo kal ai tiô púi vâ tung tơdroăng rêh ối nôkố. Ki vâ tối, Pơkâ mơ’no tơ’nôm rơtế ƀă tơdroăng mơdât pêi pro tung đảng viên “Xúa drêng pro lé lĕm rah nếo mâu kăn pêi cheăng vâ xo ngế ki ôh tá rơkê, ôh tá nhoăm mot pêi cheăng tung khu kăn”.

Mê cho môi tơdroăng ki teăm tơdrêng vâ mơdât lơ “măn hdrối” ăm dêi nhŏng o, pú hmâ, la ôh tá rơkê pêi cheăng pêi tơdroăng cheăng xiâm tung pơla pro rế lĕm tah iâ mơngế pêi cheăng ƀă xing xoăng lé lĕm mâu ngế pêi cheăng. Pakĭng mê, pơkâ xuân tơ’nôm mâu tơdroăng ki mơdât ôh tá chiâng pêi pro, mê cho: Xúa măng, xua AI tơbleăng tơdroăng ki ôh tá troh tá ai khât; hnoăng cheăng tơná ăm mơngế ki ê pêi, ví hnoăng cheăng; xúa luât ki nếo hriĕn plĕng vâ pro pơxúa ăm tơná la ôh tá tơdrăng ‘na xiâm rêi tơmeăm khoăng.