A rôh hôp kố, Vi ƀan pơkuâ Kuô̆k hô̆i hiăng ngăn, tơpui tơno 45 tơdroăng ki kal; tung mê, hiăng séa ngăn, ăm rơkkong veăng tơpui ƀă 28 tơdroăng kal pơtroh ăm Kuô̆k hô̆i a Hneăng hôp ki ôh tá xê tiah hmâ rôh má Môi ƀă 2 tơdroăng tơkêa luât pơtroh a Hneăng hôp rôh má 2; ing 3 Luât pơkâ, 8 tơdroăng Pơkâ. Kăn xiâm hnê ngăn Kuô̆k hô̆i pơkâ thế mâu kơ koan pơtối tơkŭm pêi pro klêi tơdroăng ki pơtroh hlá mơéa ki păng ‘nâng troh ăm kăn Kuô̆k hô̆i hdrối hneăng hôp, vâ mâu kăn ai hâi chôu hriăn ngăn nhên hdrối drêng vâ tơpui tơno.

Kăn xiâm hnê ngăn Kuô̆k hô̆i pơchân, mâu kơ koan kal hbrâ rơnáu, rĕng hbrâ ăm Hneăng hôp Kuô̆k hô̆i tiah hmâ rôh má 2 a khế 10/2026, tiô tối hdrối tơdroăng cheăng mơjiâng luât, séa ngăn, pơkâ mâu tơdroăng ki kal a hneăng hôp kố xuân hên; ki hdrối tâ cho athế rak vế tơdroăng ki tối tơbleăng ăm Vi ƀan pơkuâ Kuô̆k hô̆i a Rôh hôp tiah hmâ khế 8, khế 9 ƀă mâu tơdroăng ki kal hiăng châ tối tơbleăng hdrối a rôh po tơdroăng cheăng hneăng má 3/2026.