Hlá mơ-éa chêh troăng hơlâ luât pơkâ ‘na tơnêi cho tơmeăm khoăng ki krê dêi tơnêi têa, tíu rêh ối ƀă mơnhông tơbrê; cho xiâm ki vâ chiâng hnoăng pơkuâ tơnêi tíu, hnoăng pơkuâ cheăng kâ ƀă kring tơniăn tơnêi têa; cho tơdroăng chêh ‘măn ‘na tơnêi pê pâ ki kal, xiâm ki kal vâ mơnhông tơnêi têa. Tơnêi cho ki kuăn pơlê xua la Tơnêi têa ki teăng mâ pơkuâ ngăn ƀă môi tuăn rak ngăn; ôh tá chiâng mơdró kâ tơnêi ƀă ôh tá chiâng phêp ăm mơngế kong têa ê chiâng ai inâi xúa tơnêi ing tŭm tơdroăng pêi pro.

Tơnêi têa pêi pro hnoăng teăng mâ ngế xua tơnêi ing tơdroăng pơkâ hdró, pơkâ xúa tơnêi, xo tơvêh tơnêi, pơcháu tơnêi, ăm mung tơnêi, mơnhên hnoăng ngế ki xúa tơnêi, ăm phêp pơ’lêh xúa tơnêi ƀă pơkâ hâi xúa tơnêi; pơkâ yă tơnêi… Hnoăng xúa tơnêi, tơmeăm khoăng rơtế ƀă tơnêi châ luât kring vế.

‘Na pơkâ ki nhên, Hlá mơ-éa chêh troăng hơlâ luât pơkâ tối nhên mơjiâng Tơdroăng chêh ‘mot tung kơmăi dêi tơnêi têa ‘na tơnêi tiô troăng pêi tơkŭm, môi tuăn, tiô túa nếo, hên tơdroăng pơkâ; kring tơniăn tơdjêp, tơdjâk hên tíu, tối ăm ‘nâi tơdroăng chêh tung kơmăi ƀă tíu ‘măn rak tung kơmăi dêi tơnêi têa ƀă tâi tâng mâu ƀăng tơnêi hiăng ‘nâi châ chêh ‘mot. Mơ-eăm tâi hơnăm 2027, tâi tâng tơdroăng vê hdró tơnêi tíu, chêh hồ sơ ƀă chêh ‘mot tung kơmăi ‘na tơnêi ƀă tơnêi ki hâi ai hâi chêh ‘mot tung kơmăi.

‘Na chêl thiăn liăn, kơjo kum, pơtối pro hngêi ối tíu ê, Hlá mơ-éa chêh troăng hơlâ luât pơkâ ai pơkâ nhên tâ tơdroăng xo tơvêh tơnêi tâng kal vâ xua ‘na lêng, kring tơniăn, mơnhông cheăng kâ - pơlê pơla, xua vâ pro pơxúa ăm tơnêi têa, mơjiâng tơmeăm khoăng. Pơ’lêh rơdêi ing tuăn rơkê trâu nhên “chêl thiăn tơmeăm khoăng ki xo tơvêh” chiâng tuăn rơkê trâu “ ‘mâi mơnhông tơdroăng rêh ối kuăn pơlê drêng Tơnêi têa xo tơnêi”.

Mâu tơdroăng tơkêa bro pơtối pro tíu ối nếo thế tơniăn ‘na hngêi trăng troăng prôk on tơhrik, tơdroăng vâ cheăng kâ, tơmâng khât troh tơdroăng rêh ối dêi kuăn pơlê. Mê pơ’lêh luât pơkâ mơngế ai tơnêi ối a tíu tro xo tơvêh thế ai tíu ối ki ê nếo, la tơdroăng rêh ối thế tơ’mô tâng ôh thế luâ tâ a tíu ối ton.

Tơnêi têa xing xoăng, séa ngăn ƀă Pơkâ yă tơnêi drêng hâi teăm xúa, ôh tá chiâng hmếo pơ pro hên túa yă. Yă tơnêi xua tơnêi têa pơkâ ngăn a tơdroăng pơkâ mơnhông dêi tơrêm rôh, tơniăn, mơnhông cheăng kâ - pơlê pơla.  Tơnêi têa pơkâ yă tơnêi, hệ số pơkâ ‘mâi hơ’lêh yă tơnêi, kơxô̆ liăn xo ing xúa tơnêi, liâ mung xúa tơnêi, kơxô̆ liăn chêl thiăn tơtro ƀă tơdroăng ki ai khât, tiô tơrêm túa tơnêi tơniăn tơdâng, tơbleăng ăm hlo tâi tâng, tơdrăng, tơtro ki pơxúa dêi Tơnêi tea, kuăn pơlê, khu ‘no liăn pêi cheăng.

‘Na tơtŭm pêi pro, Hlá mơ-éa chêh troăng hơlâ luât pơkâ pơcháu nhên tiô tơdroăng nhên mơngế, nhên tơdroăng cheăng, nhên hnoăng cheăng ăm mâu kơ koan Tíu xiâm, kơvâ cheăng, kong pơlê tung tơdroăng pêi pro tiô luât ƀă tơkŭm pêi pro tiô Hlá mơ-éa chêh troăng hơlâ luât pơkâ, malối cho tơdroăng ‘mâu hơ ‘lêh, tơ’nôm Luât tơnêi tíu ƀă mâu luât ki ai tơdjâk troh, tơniăn tơdâng, môi tuăn, teăm tơdrêng.