Klêi kơ’nâi plâi mắc ca dêi kŏng ti pêi cheăng tiô rơnó Nông sản Đất đỏ Bazan (thôn 4, cheăm Nhân Cơ, kong pơlê Lâm Đồng) châ mơnhên OCOP 3 hơlŏng hơnăm 2024, khu mơdró kâ khên tơnôu po rơdâ tơnêi pêt. Ôh tá xê tâk roê kloăng mắc ca ối drêh dêi kuăn pơlê, kŏng ti ối roê kơmăi uâ pơliê, têng ƀă mơdiê vâ mơdêk ki kơnâ dêi plâi. Hơnăm kố, kloăng mắc ca chiâng tơmeăm tiô tối hdrối kô châ dâng 100 tâ̆n, tâk hên xôh tâng vâ pơchông ƀă hdrối nah.

Laga, rơtế ƀă mắc ca châ pêt hên hĭn cho tơdroăng ki pá tíu tê ki tơniăn. Jâ Thân Thị Thảo, Kăn pơkuâ khu mơdró kâ tối, tê mơdró điê̆n tưh cho troăng prôk ki ai hlâu la khu mơdró kâ kố xuân ối kal châ gum vâ châ xúa tơƀrê.

“Hơnăm kố mắc ca tâk 2 – 3 xôh, tíu tê ki xiâm ngin xuân ối tê tiô túa ki tê tiah hmâ ing ngế ki hmâ, ing Facebook, Zalo. Rơhêng vâ tê tung tíu tê mơdró điê̆n tưh la tá hâi rơkê ‘na tâ tung tơdrong, chêh pro đơn roê tơmeăm mê kal châ tŏng gum”.

Sap ing tơdroăng ki ai khât ‘na tíu tê mâu tơmeăm pêi lo ing chiâk, apoăng hơnăm kố, cheăm Nhân Cơ ăm xúa Tíu pêi cheăng tê mơdró điê̆n tưh a tíu pêi cheăng Đảng ủi cheăm, rơtế ƀă website nhanco.vn môi tiah “kơchơ tê mơdró tung internet” dêi cheăm. Akố, mâu khu ki pơkuâ châ gum mơjiâng pro um, djâ tơmeăm tê tung điê̆n tưh, tí tăng xiâm kối, mơđah tơbleăng, tê tơmeăm ƀă tơdjêp pơto chơ. Kơnôm mê, kuăn pơlê pêt rế hía rế pơhlêh sap ing tơdroăng ki hmâ tơkôm to tung khu ki lăm roê vâi hiăng hbrâ rơnáu châ trâm tơmối ƀă mơjiâng inâi tung internet.

Nâ Phạm Thị Nga, ngế ki pơkuâ tíu mơjiâng pro yến sào Thiên Ngọc Nga, a thôn 10, cheăm Nhân Cơ ăm ‘nâi cheăng ki tơrŭm tung tíu tê điê̆n tưh dêi cheăm hiăng po tơ’nôm rôh vâ châ achê ƀă tơmối a kong pơlê ki ê.

“Sap ing veăng tung tíu tê mơdró điê̆n tưh dêi cheăm, yến sào châ hên ngế ‘nâi troh tâ, tơmối a hên tíu tăng troh. Á rơhêng vâ tung la ngiâ ôh tá xê to yến sào mê tá mắc ca, kơphế ƀă hên mâu tơmeăm ki ê hía dêi kong pơlê kô châ mơđah tơbleăng lâp lu tâ, mơ-eăm troh a hên kơchơ tê mơdró”.

Nôkố cheăm Nhân Cơ ai 8 to tơmeăm OCOP ƀă dế vâ chêh pro klêi hồ sơ mơnhên tối tơ’nôm 4 tơmeăm ki nếo. Tung tâi tâng cheăm ai 10 khu pêi cheăng tơrŭm dế pêi cheăng tung kơvâ pêi chiâk deăng, ƀă tâi tâng kơxô̆ liăn chêh inâi lối 28,5 rơtal liăn. Kố cho tơmeăm ki kal vâ cheăm pơtối mơnhông inâi điê̆n tưh. Tiô pôa Vũ Trọng Tài, Phŏ pơkuâ Ƀơrô cheăng kâ - Troăng prôk cheăm Nhân Cơ, klêi vâ chê tơdế hơnăm pêi cheăng, tơdroăng ki ro má môi ôh tá xê to mâu kế tơmeăm châ tê tung tíu tê mơdró điê̆n tưh mê cho tơdroăng pơhlêh ki hlê plĕng dêi mâu khu pơkuâ, pêt mơjiâng pro.

“Sap ing khế 2/2026 troh nôkố, tíu tê mơdró điê̆n tưh dêi cheăm hiăng pơkâ 12 túa tơmeăm dêi 8 ngế ki pơkuâ cheăm. Ngin mơjiâng tôh pơkuâ vâ gum kuăn pơlê ăm dêi tơmeăm châ tê tung tíu tê mơdró điê̆n tưh, mơđah tơbleăng, chêh xo mâu đơn roê tơmeăm ƀă pơtối mơđah website nhanco.vn vâ inâi tê mơdró điê̆n tưh chiâng ivá mơnhông pêi chiâk deăng dêi kong pơlê”.

Tíu tê mơdró điê̆n tưh a Nhân Cơ xua mê ôh tá xê cho tíu ki chêh mơ’no mâu kế tơmeăm lơ tơdah xo đơn kok roê tơmeăm. Kố cho tíu ki tơdjêp pơla khu mơdró kâ, khu pêi cheăng tơrŭm ƀă rơpŏng ki pêt; tíu ki mâu ngế ki pêi chiâk deăng tối ăm dêi rơpó mâu tơdroăng ki rơkê plĕng, tí tăng khu tơrŭm ƀă rế hía rế mơjiâng túa pêi nếo tung mơnhông kơchơ tê mơdró. Pôa Phan Anh Tuấn, Kăn pơkuâ hnê ngăn Đảng cheăm Nhân Cơ tối tiah kố, ki tơƀrê kân má môi dêi túa pêi kố ôh tá xê ối to a mâu kế tơmeăm ki hlo hdrối mê ối a kơlo pro chiâng môi tíu tơdjêp pêt, mơjiâng pro ƀă tê sap ing pơlê cheăm.

“Tơƀrê ki apoăng ôh tá xê to châ tê tơmeăm mê ối mơjiâng pro tíu tê mơdró vâ khu mơdró kâ, khu pêi cheăng tơrŭm trâm dêi rơpó, tơdjêp, mơđah tơbleăng inâi. Ngin rơhêng vâ rế hía rế ai hên tơmeăm dêi Nhân Cơ ƀă mâu cheăm bêng ki achê châ tê tung tíu mơdró điê̆n tưh, vâ hên ngế ‘nâi troh tâ mâu tơmeăm ki xiâm dêi kơpong tơnêi kố, ki ai hlâu, ki rơdêi dêi cheăm xuân châ mơdêk há”.

Sap ing môi “kơchơ tê tơmeăm tung internet” dêi râ cheăm, Nhân Cơ dế po môi túa pêi nếo tung mơnhông pêi chiâk deăng ƀă mơjiâng thôn pơlê. Ôh tá xê to gum tơmeăm pêi lo ing chiâk deăng po rơdâ túa pêi mê ối veăng gum mơdêk pơhlêh túa tơmiât pêt, tê mơdró dêi kuăn pơlê ƀă khu mơdró kâ, tơdrêng amê hlối tối rơdêi hnoăng cheăng dêi kăn pơkuâ cheăm bêng tung pơhlêh xúa mâu tơdroăng tung internet. Mê cho tơdroăng ki mơhno ăm cheăng pơkâ kơxô̆ 57-NQ/TW dêi Khu xiâm ngăn cheăng kal kí tung tơdroăng rêh ối ƀă mâu tơdroăng pêi pro nhên, rế hía rế pro chiâng ivá vâ cheăng kâ kơxô̆ châ mơjiâng ƀă mơnhông sap ing kơpong tơnêi khên bazan Nhân Cơ, kong pơlê Lâm Đồng.