Sap apoăng hơnăm 2026 troh nôkố, troh hâi pŭn rêm măng tĭng, Vi ƀan kuăn pơlê cheăm Hàm Tân, kong pơlê Lâm Đồng tơkŭm po hâi “hmâng hlối tơpui ƀă kuăn pơlê” a tíu  ối dêi cheăm. Pôa Trương Quang Lập ối a cheăm Hàm Tân tối, túa pro mê,  ai pơxúa, hlối hlâu vâ kuăn pơlê châ tơpui tơno ƀă mâu kăn kong pơlê.

Băng: “Mâu hlá mơ-éa ki tơdjâk troh tơnêi xuân tô tuăn hêng hôu, la kơnôm ai hâi pŭn rêm măng tĭng ai túa tơdah kuăn pơlê, mê ai mâu kăn râ kơ pêng xuân hnê ăm ngin mâu túa lăm pro vâ klêi, hlối rĕng”.

Pôa Lê Văn Hòa khĕn kơdeăn tơdroăng kăn ƀô̆ pêi cheăng ƀă kuăn pơlê tiah mê tro:

"Vâ tối, kăn ƀô̆ akố rơkê ƀĕng ƀeăn ƀă tơdroăng cheăng, la xua pơ'lêh nếo mê xuân ối hrá há pêi cheăng. Ki khât ăm hlo, ngế ki lâi xuân kơhnâ pêi cheăng tâi ivá tơná. A troh akố lăm pro hlá mơ-éa tơnêi, klêi mê i pro hlá mơ-éa ‘na mâu tơdroăng ki tơdjâk troh tơdroăng khôp, vâ tối vâi pêi cheăng kơhnâ khât, a hlo hôm”.

Sap ing tơbleăng túa pêi pro troh nôkố, mâu kăn cheăm Hàm Tân hiăng tơdah lối 320 tơdroăng hnê tối ‘na mơjiâng mâu kăn ƀă tah tơdrêng hlối ki xơpá tơvâ tơvân dêi kuăn pơlê tung  pro hlá mơ-éa.

Ôh ti xê to a Hàm Tân, kơxo hâi Pơtăm rêm măng tĭng ki apoăng dêi khế 7 kố nah, bêng Phú Thủy xuân cho rôh apoăng tơbleăng túa “Kơphế kơxo dêi mâu kăn bêng ƀă kuăn pơlê”. Tơdroăng mê tơdrêng mê hlối tơ’mot ki tơmâng khât dêi krâm kuăn pơlê.

Mâu kăn bêng Phú Thủy ăm ‘nâi, tơdroăng chêh pơkâ khu tơrŭm cheăng “Kơphế kơxo” tiô rơnó rêm khế môi hdroh, pơ’lêh dêi rơpó tơkŭm po a 12 tôh kuăn pơlê kơphô̆ tung kong pơlê. Jâ Nguyễn Thị Minh Ngọc, Kăn hnê ngăn Vi ƀan Măt trâ̆n Tơnêi têa Việt Nam bêng Phú Thủy tối nhên, pơkâ dêi túa pêi cheăng mê vâ troăng hơlâ “achê kuăn pơlê, a chê tíu pêi cheăng”.

"Ƀă mâu tơdroăng ki chiâng tơpui tối pêi pro tơdrêng hlối mê mâu kăn xuân hiăng hnê mơhno ăm mâu ƀơrô pêi cheăng ‘na tơdroăng ki mê tơpui tơno tơdrêng hlối a rôh ôu kơphế. Ƀă mâu tơdroăng ki kal thế tăng ngăn ‘nôi hồ sơ vâ tơleăng mơnhên mê Khu kăn Măt trâ̆n tơkŭm nếo ƀă pơ’lêh mâu tơdroăng ki tơdjâk troh hnoăng pơkuâ tơpui tối nhên ‘na mâu tơdroăng dêi mâu ƀơrô pêi ‘na hnoăng cheăng ki mê tơkŭm tâi tâng ƀă hnê mơhno tơleăng mơnhên teăm tơdrêng ăm kuăn pơlê”.

Tơdroăng mê xo ki môi tuăn dêi kuăn pơlê ƀă khu mơdró pro loăng rêk vê dế tơbleăng rơdêi. Mâu rôh “Kơphế kơxo” lơ mâu hâi “hmâng kuăn pơlê tối” dế veăng ‘no hnoăng tơpêng tuăn loi, mơjiâng môi tơdroăng cheăng pro hlá mơ-éa xo ki môi tuăn dêi kuăn pơlê pro loăng rêk hdró.