Troh a tơraih tơƀai lâp plâi tơnêi Nội Bài tơdah khu kăn mê ai jâ Nguyễn Thị Thanh, Phŏ kăn xiâm hnê ngăn Kuô̆k hô̆i; pôa Vũ Hải Hà, Phŏ pơkuâ Vi ƀan xiâm cheăng Lêng, Kring tơniăn ƀă Tơpui kâ. Hneăng lăm pôu Việt Nam rôh kố dêi khu kăn xiâm kong têa Kul po troăng ki nếo tung tơdroăng tơrŭm cheăng péa Kuô̆k hô̆i, rơtế pêi pro mâu tơdroăng troh pơkâ xo kuăn pơlê ối tơdế rá, tơbleăng mâu tơdroăng tơrŭm cheăng pơla péa pâ.

Tung hneăng lăm pôu rôh kố, jâ Samdech Khuon Sudary, Kăn xiâm hnê ngăn Kuô̆k hô̆i Kul  tơpui ƀă pôa Trần Thanh Mẫn, Kăn xiâm hnê ngăn Kuô̆k hô̆i, tơpui ƀă kăn xiâm Việt Nam, lăm pôu ngăn mâu grup, hngêi pơkeăng dêi Việt Nam. Pakĭng mê, mâu kơ koan pơkuâ cheăng dêi Kuô̆k hô̆i péa tơnêi têa ai rôh tơpui tơno mơdêk tơrŭm cheăng tung la ngiâ.