Lô sầu riêng Dona lối 14ha dêi 10 rơpŏng kuăn pơlê a thôn 19/5, cheăm Krông Pač ai plâi dâng 350 tâ̆n châ tơbleăng tơ’noăng yă apoăng 55.000 liăn/kg. Veăng tơ’noăng yă ai 10 khu mơdró ki lăm rôe ƀă tê tơmeăm pê lo ing chiâng deăng ăm kong têa ê. Kŏng ti pêi cheăng tiô rơnó Tê rôe Tơmeăm pê lo ing kong têa ê Nguyên Thuận (Pơlê kong kân Hồ Chí Minh) cho tíu pêi cheăng tơbleăng há yă châ tơƀrê ƀă kơlo yă rôe 68.000 liăn/kg, tơ’mô ƀă yă kĭ hơp đong dâng 23,8 rơtal liăn.

Pôa Mai Đinh Thọ, Khu pêi cheăng tơrŭm tơmeăm pê lo krúa Krông Pač, kong pơlê Dak Lak tối, tơdroăng tơbleăng tơ’noăng yă ôh ti xê to gum ai pơxúa cheăng kâ dêi plêi sầu riêng mê ôi pro xiâm vâ mơngế ki pêt sầu riêng mơdêk pê lo plâi rế lĕm krúa.

“Klêi tơ’noăng há yă mê, mơngế ki pêt châ mơhúa ai yă xuân hâk tơngăm xua châ rah xo kơdrum plâi ki lĕm má môi, xú lĕm má môi vâ tơbleăng ăm mơngế vâ rôe. Pakĭng mê nếo, mơngế ki tê tơdjâk tơvêh, ôh ti xê to tâk tơ’nôm ki tơbrê ‘na cheăng kâ mê ối mơhnhôk pêi, hlối hâk tơngăm dêi mơngế ki pêt sầu riêng”.

Tơdroăng tơ’noăng yă a kơdrum sầu riêng cho môi tung mâu tíu ki nếo dêi Leh tơbleăng Sầu riêng Dak Lak hơnăm 2026, veăng mơjiâng inâi plâi sầu riêng dêi kong pơlê tiô troăng tơƀrê, tơdrăng ƀă mơdêk tơbriêt tê a kơchơ. Tiô Khu Tơkŭm po, sap nôkố troh hâi lơ 20/8 kô pơtối tơkŭm po péa rôh tơ’noăng. Tiô tối hdrối dâng 200 ha sầu riêng, plâi gá dâng 4.600 tâ̆n, kô ai tiô pơkâ plâi lĕm ƀă mah kơxô̆ kơpong pêt kô châ tơbleăng tơ’noăng, pro ƀâng tơdjêp tơdrêng pơla khu mơdró ƀă kơpong ki pêt.

Pôa Lại Đức Đại, Kăn hnê ngăn Vi ƀan Kuăn pơlê cheăng Krông Pač ăm ‘nâi, klêi tơ’noăng yă apoăng luâ ki tơngah dêi Khu Tơkŭm po, pro xiâm vâ kong pơlê pơtối pro klêi túa tơ’noăng yă ƀă mơdêk ki pơxúa dêi kơvâ ‘na plâi sầu riêng.

“Rôh tơ’noăng yă hâi kô tơkâ luâ tơdroăng tơngah dêi Khu tơkŭm po. Châ hnê mơhno dêi Vi ƀan Kuăn Pơlê kong pơlê tung mơjiâng  pêi pêt ƀă kơvâ sầu riêng, ngin hlo tơkŭm tơ’noăng yă cho môi tơdroăng pêi pro vâ chôa lâng mơhno inâi sầu riêng Krông Pač tối krê ƀă sầu riêng Dak Lak tối tơdjuôm a kơchơ mơdró. Mơngế pêt sầu riêng kô ôh ti xê to châ tê dêi plâi mê ối tê dêi ki pơxúa ing mâu hnoăng cheăng pêi ki vâi tơxâng châ xúa”.

Kong pơlê Dak Lak ai dâng 45.000 ha sầu riêng. Hơnăm 2025, plâi châ lối 390.000 tâ̆n, pro pơxúa lối 1,1 rơtal USD. Hơnăm kố, plâi mơni châ lối 500.000 tâ̆n. Tiô Khu xiâm ngăn ‘na Chiâk deăng ƀă Hyôh kong prâi kong pơlê Dak Lak tối, ki tơƀrê dêi rôh tơ’noăng há yă apoăng cho xiâm vâ kong pơlê pơtối pê klêi, ƀă po rơdâ tơ’noăng há yă tung mâu rơnó plâi sầu riêng pơtối ah nếo.