Mâu hâi ki kố, mâu tơdroăng ki pâ mơnê troh mâu ngế ai hnoăng châ tơkŭm po lâp lu tung pơlê Dak Lak. A 12 tíu ki tơdah xo túa ki vâ séa ngăn ADN dêi nhŏng o rơpŏng hngêi mâu mố đô̆i hlâ xua Kŏng an kong pơlê Dak Lak tơbleăng, cheăng xo túa châ pêi pro thâ, rơkê. Đăi tă Võ Hùng Tường, Ngế pơkuâ Ƀơrô Kăn sat Pơkuâ ngăn mơ-éa ‘na tơniăn tung pơlê pơla, Kŏng an kong pơlê Dak Lak ăm ‘nâi, pakĭng 12 tíu tơdah xo ki pơkâ pêi môi tíu, tíu pêi cheăng ối pro 12 tôh pêi cheăng troh a rêm hngêi mâu nhŏng o, rơpŏng hngêi dêi mâu mố đô̆i hơnăm hiăng krâ, ivá hiăng ôh pá hro, ôh tá chiâng prôk lăm xếo vâ xo túa.

“Ngin tơbleăng pêi pro tung 4 hâi, sap ing hâi lơ 23/7 troh lơ 26/7. Krê hâi apoăng tơbleăng pêi, ƀă tơdroăng ki mơ-eăm pêi pro dêi mâu khu ki pêi dêi hnoăng cheăng, ngin hiăng châ xo 928 túa, tung mê, ai 15 ngế châ pêi pro a hngêi nhŏng o, rơpŏng hngêi mâu mố đô̆i ki hiăng hlâ. Apoăng cho 2.886 ngế ƀă ối lối 2 hâi nếo, kơxô̆ ki u ối ngin kô pơtối tơkŭm xo klêi vâ rak tơniăn tâi tâng túa pơkâ”.

Rơtế ƀă cheăng xo túa vâ séa ngăn ADN châ tơkŭm po tơniăn thâ, tơdroăng ki pro hngêi gum kuăn xiâm mâu mố đô̆i ki tro trếo ‘mêi xuân châ tơbleăng pro tung khế 7 kố. Rôh kố, kong pơlê Dak Lak tơbleăng pro nếo 22 toăng hngêi ƀă ‘mêng 20 toăng ki ton ăm mâu rơpŏng. Cheăng pro nếo, ‘mêng hngêi ki ton tiô tối kô klêi tung hâi lơ 27/7 kố. A bêng Ea Kao, bêng ki pro nếo 2 toăng hngêi ƀă ‘mêng rơnêu 1 toăng hngêi ki hiăng tơ’nhiê. Thiê̆u tă Đỗ Anh Dũng, Chính trĭ viên phŏ Pơkuâ ngăn lêng bêng Ea Kao, ăm ‘nâi, ƀă tơdroăng ki veăng pêi kơtăng dêi khu pơkuâ cheăng kal kí, tơdroăng cheăng pêi hiăng vâ châ pro klêi.

“Tung tơdroăng ki cho kơ koan ki veăng tơdrêng tung cheăng mơjiâng pro, ‘mêng rơnêu hngêi ăm mâu vâi kuăn dêi mâu mố đô̆i veăng tung rôh tơplâ tro trếo ‘mêi, Khu pơkuâ ngăn lêng bêng hiăng chêh pro túa pơkâ veăng tí tăng ‘nâi plĕng ăm Vi ƀan hnê ngăn bêng tơbleăng pêi pro. Ngin hmâ tơrŭm ƀă rơpŏng hngêi, mâu ngế ki pro hngêi ăm mâu rơpŏng mâu mố đô̆i ki hlâ”.

Tơbâ 79 hơnăm hâi mố đô̆i rong râ, hlâ hía hơnăm kố, Vi ƀan hnê ngăn kong pơlê Dak Lak hiăng ‘no 21,5 rơtal liăn sap ing liăn ngân, mơjiâng 15 khu ki pêi dêi hnoăng cheăng tơkŭm pôu kơ-êng, mơhnhôk ƀă diâp tơmeăm ăm 36.000 rơpŏng ki châ tơnêi têa gum. Pakĭng mê, Dak Lak ối pêi pro ƀă diâp tơmeăm dêi Kăn xiâm hnê ngăn tơnêi têa ăm 27.200 ngế ki châ tơnêi têa gum tung lâp kong pơlê, ƀă tâi tâng liăn ‘no 8,23 rơtal liăn. Pôa Phan Đại Thắng, Phŏ pơkuâ Khu ngăn kong pơlê, cheăm bêng ƀă hnoăng cheăng mâu kăn ƀô̆ kong pơlê Dak Lak ăm ‘nâi, tâi tâng mâu tơmeăm hiăng châ pơtroh ăm Vi ƀan hnê ngăn 102 to cheăm, bêng vâ diâp a kŏng mâu rơpŏng ki châ tơnêi têa gum. Pakĭng mê, Khu ối tơrŭm ƀă khu ki ai tơdjâk troh tơbleăng pêi hên tơdroăng pâ mơnê troh mâu ngế ai hnoăng rôh 27/7.

“Rêm râ Đảng, kăn pơkuâ a kong pơlê Dak Lak kô tơkŭm lăm têk nhăng tơbâ mâu ngoh mố đô̆i ki hiăng hlâ a mâu ilâng kiâ mố đô̆i; ‘mêng rơnêu mâu kế tơmeăm pro Tơnêi têa chêh xo hnoăng tung lâp kong pơlê. ‘Na tơdroăng cheăng pêi thâ 500 hâi măng, vâ tơkŭm, tăng inâi mâu mố đô̆i ki hlâ, Khu ngăn kong pơlê, cheăm bêng ƀă hnoăng cheăng dêi mâu kăn ƀô̆ tơrŭm ƀă Khu pơkuâ ngăn lêng kong pơlê ƀă mâu cheăm bêng tơkŭm mơnhên, tơkŭm xuân môi tiah tí tăng kơxêng kiâ mố đô̆i ki hlâ tung rôh tơplâ”.