Tung rôh pêi cheăng krâu sap hâi lơ 23 troh lơ 26/7, Kŏng an kong pơlê Lâm Đồng tơkŭm tơdah xo 1.521 mauh sinh phẩm ADN dêi nhŏng o mô đô̆i tiô hdrông hdrê peăng pá kơdrâi. Tơdroăng xo mauh châ pêi pro rơtế a 16 tíu tơkŭm tung kong pơlê ƀă 3 tôh troh lâp lu troh a hngêi mâu Nôu Việt Nam Khên tơnôu, nhŏng o mo đô̆i ki hlâ tung tơplâ xâ hơnăm hiăng hên, ivá ôh tá pá hro lơ ôh tá ai ivá vâ prôk lăm.

Ai mâu hâi ing kơxo má vâ pêi pro tơdroăng xo mauh, jâ Phùng Thị Huệ, nhŏng o mô đô̆i rong râ hlâ hía Nguyễn Văn Thái, tối pói vâ rĕng mơnhên inâi nhŏng o vâ rơpŏng ƀă kuăn cháu ai tíu chôu nhang tơbâ.

‘’Tơdroăng pói vâ kân má môi dêi rơpŏng cho mơnhên tro inâi dêi pôa. Nôkố tơnâp hiăng djâ a ilâng laga tá hâi ai inâi. Ngin bu pói vâ kuăn cháu troh chôu nhang mê ‘nâi troh tíu, troh mơngế vâ tơbâ’’.

Tơdroăng tơdah mauh sinh phẩm ADN ôh tá xê to kơnôm mơjiâng ‘noăng chư chêh mơnhên inâi mô đô̆i hlâ tung tơplâ xâ mê ối mơhno hnoăng, hiâm mơno pâ mơnê ƀă mâu ngế hiăng pleăng dêi mơheăm chhá xua tơniăn krê, tơniăn lĕm dêi Tơnêi têa. Thươ̆ng  tă Võ Xuân Bình, Phŏ Kăn pơkuâ ƀơrô Kan sát pơkuâ mơ-éa cheăng kâ rêh ối ƀă tơnêi têa pơlê pơla, Kŏng an kong pơlê Lâm Đồng tối ăm ‘nâi, khu kŏng an hiăng mơhnôk tâi tâng mơngế, rơxế, tơmeăm khoăng vâ pro tơ’lêi hlâu má môi ăm nhŏng o mô đô̆i hlâ tung tơplâ xâ xo mauh.

“Kŏng an kong pơlê hiăng mơjiâng 16 tíu tơdah mauh sinh phẩm ADN tung lâp kong pơlê ƀă 3 tôh prôk troh lâp lu troh a hngêi mâu Nôu Việt Nam khên tơnôu, nhŏng o mô đô̆i hlâ tung tơplâ xâ hiăng krâ ôh tá pá hro, prôk lăm pá puât. Ngin khŏm mơ-eăm kêi đeăng hnoăng cheăng tro tơdroăng, tơniăn ki dâi lĕm ƀă rak tơniăn ‘noăng chư chêh’’.

Rêm mauh sinh phẩm ADN châ tơ’nôm kô po tơ’nôm rôh tơ’lêi mơnhên inâi môi mô đô̆i ki hlâ tung tơplâ xâ nah tá hâi ‘nâi nhên tơdroăng kal, gum pêi pro châ tơƀrê Tơdroăng tơkêa bro mơjiâng tíu ‘măn gen mô đô̆i hlâ tung tơplâ xâ vâ tơxâng pói vâ dêi hên rơpŏng klêi chât hơnăm tơkôm nhŏng o châ vêh ƀă pơlê xiâm, inâi hơnăm dêi tơná.