Hâi lơ 20/7, a bêng Tuy Hòa, Vi ƀan Măt trâ̆n Tơnêi têa Việt Nam kong pơlê Dak Lak hiăng tơkŭm po mơgêi tơdroăng pro 475 toăng hngêi Tơrŭm sap ing kơxô̆ liăn gum 38 rơtal dêi pơlê kong kơdrâm Đồng Nai, mâu khu mơdró kâ ƀă Khu xiâm pơkuâ Mố đô̆i gâk tơkăng kong. Rôh kố, kong pơlê Dak Lak hiăng tơbleăng tơdroăng gum pro tơ’nôm 300 toăng hngêi tơrŭm ăm rơpŏng kơtiê, vâ chê kơtiê.

Kơxô̆ liăn châ xo ing tơdroăng tŏng gum dêi pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa diâp ăm khu râng liăn “Xua vâ gum mâu kơtiê” kong pơlê. Rêm toăng kô châ xo kơlo gum 80 rơtuh liăn. Vâ kơdroh iâ ki hngăm ăm mâu rơpŏng, kong pơlê kô hbrâ rơnáu tơ’nôm liăn veăng tơlo ing pơlê pơla nhŏng o rơpŏng hngêi, khu mơdró kâ ƀă pơlê pơla.

Tơdroăng kố ai pơxúa kal khât, pro chiâng tíu tŏng gum tơniăn ăm mâu rơpŏng ki xơpá tơniăn ai tíu ối vâ pêi cheăng, veăng gum mơdêk rĕng pơkâ pêi ‘nhiê tah hngêi ối pơtân, xi kơchoh a kong pơlê.