A tíu ki dế mơjiâng pro kơpong vêh pro pơlê nếo rơdâ châ 5 ha a cheăm Hồng Sơn, kong pơlê Lâm Đồng ai lối chât ngế kŏng nhân rơtế ƀă hên mâu kơmăi, rơxế dế pêi pro dêi hnoăng cheăng a drô troăng prôk tung kơpong mê. Pôa Đặng Hữu Linh, Ngế ngăn ‘na tơdroăng mơjiâng pro tơmeăm akố tối ăm ngin ‘nâi, khu kố dế pêi pro rĕng, troh nôkố hiăng pêi pro vâ kêi châ tơdế hnoăng cheăng.

“A tíu ki dế mơjiâng pro kố la lâi xuân ai lối 25 ngế kŏng nhân, riân ta ngế ki pêi cheăng ƀă kơmăi, rơxế. Dế nôkố, nhŏng o ngin dế tơkŭm thăm mơdêk rĕng hnoăng cheăng vâ rak vế tơniăn tro tiô pơcháu athế pêi pro kêi đeăng tơdroăng kố a khế 9 hơnăm 2026”.

A tíu ki dế mơjiâng pro pơlê nếo a cheăm Lương Sơn, kong pơlê Lâm Đồng, mâu ngế kŏng nhân rơtế ƀă hên mâu kơmăi, rơxế ki ê dế thâ pêi ăm rơxế lu kơtâk troăng. Kơpong pro pơlê nếo a cheăm Lương Sơn châ mơjiâng pro tung tơnêi kân rơdâ lối 4 ha, klêi kơ’nâi pêi pro mê kô ai tơnêi tíu ăm lối 400 rơpŏng châ ối a pơlê nếo. Tíu ki kố ối ai tíu xiâm tê mơdró kế tơmeăm ki kân. Pôa Phạm Huy Hoàng, Ngế ngăn ‘na tơmeăm khoăng akố tối ăm ngin ‘nâi, ƀă ivá cheăng pêi trối nôkố, mê khu ki kố kô pêi pro kêi hnoăng cheăng a tơdế khế 8 kố ah.

“Rêm hâi, a tíu ki mơjiâng pro hiăng ai 8 hnoăng pêi ki xiâm, rêm hnoăng pêi mê ai sap ing 10 troh 12 ngế cheăng. Hnoăng cheăng ki rak tơniăn tung pêi cheăng, rak tơniăn ‘na krúa lĕm tơnêi tíu pơrá châ pêi pro tro tiô hlá mơ-éa pơtroh thế dêi kong pơlê. Pơtih, kơxái on lơtrik xuân châ djâ troh akố ăm i tơniăn, ôh tá ăm chiâng ai xía vâ. Mâu tơnêi tíu ki lâi tro tơhnâp, tro kơhlong kơhlăng mê athế hnhâng kơxái hdró tâ tá vâ tối tơbleăng ăm mơngế prôk lăm ‘nâi vâ ví, tâp mâu chư chêh tơbleăng vâ tơniăn ăm tơdroăng prôk lăm ƀă mâu nhŏng o ki pêi cheăng a kơpong kố”.

Vâ gum ăm tơdroăng tơkêa bro troăng rơxế lơtreng ki kơtâu têi, kong pơlê Lâm Đồng hiăng gu pro bâ tơnêi tíu lối 1.000ha. Kong pơlê dế thâ pêi pro kêi vâ mơjiâng 8 pơlê nếo ăm vâ chê 1.000 rơpŏng ki tro tơdjâk, xua vâ mơjiâng pro troăng. Pôa Đặng Tuấn Anh, Kăn ngăn ‘na Tơdroăng tơkêa bro mơ’no liăn cheăng kơxô̆ 2 kong pơlê Lâm Đồng tối ăm ngin ‘nâi, dế nôkố, tâi tâng tơnêi tíu akố hiăng châ pơcháu tŭm vâ mâu khu ki kố pêi cheăng, bro mơjiâng 8 tơdroăng tơkêa bro. Tơdrêng amê, mâu tơdroăng ki ối kreăng, tơvâ tơvân tung pơla pêi cheăng mê xuân hiăng châ lêi tah vâ thăm rĕng kêi mâu hnoăng cheăng:

“Mâu klôh ki chiâ xo mâu tơmeăm khoăng tung kơdâm tơnêi a kong pơlê Bình Thuận hdrối nah, ki malối kơpong peăng Hdroh ai hên klôh ki chiâ xo tơmeăm hiăng tâi hâi khế ăm phep pêi cheăng, xua mê, ôh tá chiâng vâ pêi pro a kơpong kố. Ngế ki ngăn ‘na hnoăng mơ’no liăn ngân hiăng tơrŭm cheăng ƀă Khu ngăn ‘na Chiâk deăng ƀă Hyôh kong prâi ƀă mâu khu ki ai tơdjâk troh tăng troăng vâ lêi tah lôi ki xahpá mê. Dế nôkố, mâu tơdroăng ki ối tơvâ tơvân mê hiăng châ lêi tah, tŏng gum, mâu ngế ki pơkuâ ngăn ‘na mơjiâng pro troăng dế thăm mơdêk hnoăng cheăng vâ rĕng châ pêi pro kêi tung la ngiâ, vâ pôi ta hrá”.